Aizawl: Mizoram State Consumer Dispute Redressal Commission (State Consumer Court) (MSCDRC) chuan Serchhip District Hospital-a nau chunga thi, Malsawmkimi, Tlangpui khua thih chungchangah Mizoram sorkar chu zangnadawmna Rs 52,20,800 pe turin a ti.
Kum 2021 khan Malsawmkimi hian nau nei turin District Hospital, Serchhip panin a inentir a. Ultrasound-te tih a nih hnuah nau nei turin admit a ni. Admit a nih hnu hian damdawi hmangin nau vei chawptir a ni a, damdawi hmanga nau veitir a nih ni hnihna zan dar 8:30 ah naute chu a thi sa in a hring a ni.
Nau veitir a nih hma hian naute leh a nu hi tha vekin doctor chuan a ngai a; mahse, naute hi thi saa a pian hnu lawkah a nu hian thi put neiin, a thi put hi a nasat tak avangin a hnu lawk zan dar 10:40-ah Post Partum Haemorrhage (PPH) avangin a thi ve leh ta a ni.
He thil thleng avang hian District Hospital, Serchhip chuan dem a hlawh nasa hle a. Mizoram sorkar pawhin Magisterial Equiry dinin, Serchhip DC chu a zirchian tir nghe nghe.
Malsawmkimi hian a hmain nau vawi li lai a lo chhiat tawh a, neih pangngaiin pathum a nei tawh a. Nau vawi li a chhiat tawh avangin zaichhuah an dil nia sawi chu, damdawi ina thawktuten an dil lo tiin an sawi a, a chang phei chuan he damdawi ina nau lo nei tawh thenkhat sawi dan phei chuan, hospital staff-te hi damlo an enkawl dan chungchangah an vin thei hle niin, MSCDRC chuan an sawi.
Magisterial Enquiry report hian medical expert team-in enfiah nise tia rawtna angin, Civil Hospital Aizawl atangin Malsawmkimi thih danah tihsual emaw, felhlel emaw a awm em tih zirchiantir leh a ni a. Malsawmkimi hian nau vawi eng emaw zat a lo chhiat tawh avang leh amah pawh kum 40 lai a nih tawh avangin engtik lai pawha nau zaichhuah theihna hmun pan tura tih awm tak a ni tih chu medical expert-te ngaihdan a nih thu an report-ah hian a chuang a ni.
Malsawmkimi thih chungchangah hian a pasal Zaithankima chuan felhlel a awm ni a ngaiin, Gauhati High Court (Aizawl Bench)-ah a zualko a. Gauhati High Court hian Malsawmkimi, District Hospital, Serchhip-in an enkawl danah hian felhlel awm ngei nia a hriat avangin Rs nuai 5 a lo chawi tir tawh a. Hetih rual hian, zangnadawmna tam zawk phuta hmun danga an zualko duh a nih pawhin a phalsak a, Zaithankima hian State Consumer Court-ah thubuai theh lutin a zualko leh ta a ni.
Thubuai an thehluh a chhannah, Principal Director, Health Services chuan Tlangpui Health Sub-Centre-a a inentirna atanga a lan danin, Malsawmkimi hian Anaemia with Chronic Hypotension a vei niin a ngai a. Chu chu Serchhip Hospital-a doctor-te hian ngai pawimawh lovin anaemia atan hian an enkawl zui lo va, hengte avang leh doctor an nihna anga an mawhphurhna an hlen tawk loa ngaiin District Hospital, Serchhip-a thawkte hi thiam loh a chantir ta a ni.
District Hospital, Serchhip-ah hian Malsawmkimi’n nau a neih lai hian damdawi ina thawk nurse ni lo, mi dang ai kalin a enkawl a, hei hi State Consumer Court chuan a ngai thutak hle a. Damdawi ina nurse hnathawkte hian anmahni tihtur ti lova, midang damlo an enkawltir hi State Consumer Court chuan pawi a ti tak zet thu, MSCDRC thuchhuah chuan a tar lang.