AZL: Excise & Narcotics Department-in kudam pakhat atangin zu um 2,940 an man bakah, ruihhlo tam tham tak an man bawk.
Nilaini zan dar 9 khan END hian Falkland East venga kudam pakhat atangin, zu um puitling (750 ml) hrang hrang – Royal Stag whisky, Signature whisky, Blenders pride whisky, Iconiq white whisky, Royal Stag barrel whisky, Royal Green Whisky, Afterdark whisky, Malt in Black whisky, Old Monk rum te bakah Kingfisher beer (500 theuh) can 84 an man.
Zu man zawng zawng hi um 2,940 (case 245) leh beer case thum chuang a ni.
He kudam luahtu leh zu neitu, Ruthi Lalrammawii (31), Phunchawng Mel-6 nia inchhal pawh man nghal a ni a, MLP Act 2019 tlawhchhanin thubuai siamsak a ni.
Nilaini vek tlai dar 4:24 khan END, FGT (BSF), Aizawl leh 191 BSF thawkho chuan Tuikhurhlu (Edenthar)-ah heroin gram 707 (hawng 49) leh methamphetamine kg 14 & gram 905 (tablet 1,50,000) leh a neitu nia puh mi pahnih — Nangsianmuanga (21), Khawmawi, Myanmar leh Nangsiansiam (18), Sezang, Tiddim, Chin State, Myanmar-a khawsa nia inchhalte an man.
An hnen atang hian mobile handset pahnih leh Scooter pahnih hrensak a ni bawk. Heng ruihhlo an mante hi Myanmar atanga lak, Mizoram pawn lama tihral tura ruahman mek nia sawi a ni.
Heroin leh Methamphetamine neitute hi dan tlawh chhanin thubuai siamsak an ni.