- Zirsangkima
Kum 1994-a tih chhuah, film hmuhnawm leh hit zet mai, “Speed” an chan dun laia inhre tan kha an ni a; khata tang bawk khân thian tha an nihna pawh a intan ve nghâl. Vawi te khat mah Keanu Reeves leh Sandra Bullock te hian hmangaih biah thu an inhlàn miah lo a; a chhin paw’n inngaizáwng angin an la awm eih lo! Thian tha an nihna erawh, khata tang khân—vawiin thlengin—chhut chahin a la awm ngai lo thung.
“Hmangaihna kawng zawh dùn ngai miah lo,” kan ti chungin—a hnu fé-ah—an pahnih hian, vàntláng hriatah—hun hran leh hmun hran ve ve-ah—“Speed” film an siam laia “a rûka an in-star ve ve thu” an sawi chhuak leh ang lawi a! An tlai ve ve tawh si! Sâp mi lârho, zak thei lo deuh tùra kan ngaih te meuh pawh khuan, a rûka lo inngaihzàwn reng ang chi hi an lo nei ve chiang mai!
Chuti lam erawh ka sawi tum a ni lo e … ka thu hma mai a nih khi!
~o~
Kum 2010 June thla a ni. Zíng kár atanga Los Angeles khaw dul leh uap churh mai chuan, Sandra lung chu a ti zíng zual hle mai. A lu chu rit lúk a, thâwk lâk harsat ang mai hian na deuh takin a thaw leh huai thìn.
A pindanah nau tê a la mu a. Sandra Bullock chu amaha chokaa ngawi renga thu chungin a melh ngai a melh tlawk tlawk a; a thil en lai chu “hmu loin a thlír reng”! A hawina lam apiang mai chu a hnawk nuai mai bawk a. An tui khawihnaa tui tling pum mai chu a thlír tlawk tlawk bawk. Ti faia thuah fai tùrin thâ rêng a nei lo!
An pindan lam a’n ngaihtuah leh zawk a—a rilru luahtu atána a duh loh êm êm mai chu. An pindan a ngaihtuah chhuaha a hriat chian êm êm chu—“a ruak ta huai mai!” tih zawng a ni.
Ni e, a pindanah chuan hmun âwl a zau ta êm a ni! A chhan chu, a pasal duh tak, kum nga chhúng hmangaih taka a lo pawm reng thin, Jesse James chuan a chhuahsan ta si a ni—an pindan leh a nun chu! Chutah, a tih ngai loh angin Sandra chu a tap ta ringawt a!
Chutih lai tak chuan, tù emaw hian an kawngkapui chu a rawn kik a.
Kawngka chu a va hawng. Chutah, Keanu Reeves chu paper bag leh ram pangpár buk tha angreng tak, a lawh chawp tih hriat reng kengin kawngka biangah chuan a lo ding reng mai.
‘Eng nge i mamawh ka hre lo a…’ Keanu chuan a ti sap a, ‘ih … eng eng emaw tlem tê ka rawn keng ve a…’
Keanu chuan Sandra chu zawhna a zâwt lo. A zawhna chhànna tùr a hre sa vek e.
‘I tha mai ang,’ tiin emaw, ‘Hunin a la liampui mai dáwn alãwm,’ ti emawa a thiannu chu hnem a tum hran lo.
Tawng duah ai chuan a kawr bán a pawt chhíng sauh sauh a, paper bag-a a thil rawn ken, ei tùr leh sekrek mamawh chu a phawrh sawk sawk a. Coffee bag/pocket a phawrh rualin a siam nghâl sawk sawk bawk.
Chokaa Keanu-a che vêl chu Sandra chuan ngawi rengin a lo thlír reng a— “Speed” leh “The Lake House” film-tea amah hmangaihtu lema chang thìn kha, tûnah—a tak takah hian—a nihna a va lang fiah ta si êm!
An pahnih chuan ngawi rengin coffee inin dawhkàn an kîl dùn a. Keanu chu a dâk chhuak hmasa. ‘Hetiang hi nangmah chauhin i paltlang kher lo ang,’ a ti chhuak ta chauh a.
Sandra mittui chu a tla leh ringawt a!
Chutah, ‘Ka hria alãwm,’ a ti sap a, ‘nang i awm a…’
Chu ni nguai leh ngui zet mai chuan tlai a hma chhawn lo thei si lo a. Chu hunah chuan Keanu chuan a thiannute nufa chu zanriah a buatsaihsak a. Sandra leh a pasal hlui ni ta, Jesse James te fa lâk hlim hlawl, thla thum leh a chanve mi Louis Bardo Bullock chu Keanu chuan a hrai a. Zanriah an kîl dun hnu thleng chuan Sandra-te nufa kiangah chuan a awm zui ve reng a ni.
A chhuah dáwn chuan kawngkapui atanga hawi lêtin Keanu chuan, ‘Zàn hi rei lutuk i ti a nih chuan, min rawn bia ang che aw…’ tiin a thiannu Sandra chu a mang tha ta a.
Kum a liam a—tam tak a liam ta. Sandra Bulluck chuan khami ní-a a thianpa Keanu Reeves-a thil tih kha, mittui nèn a sawi chhuak leh thìn:
‘Pa fel leh pa tha tak—mipa dik tak a ni. Eng mah min dílin thu tam a sawi ngai lo; ngawi rengin ka tán a awm reng thung thìn…’ tiin.
Hei hi a ni, thian tha neih manhlàna chu!
Ni e, Keanu-a kawngka kik mai khân Sandra khawvêl pik chun mai chu a vai kiang a ni mai si a…