Aizawl: Lengteng bialtu MLA F Rodingliana’n nimin khan MHIP, Ngopa Golden Jubilee (Kum 50-na) lawmna, Ngopa Jubilee Hall-ah khuallian niin a hmanpui a, jubilee souvenir a tlangzarh bawk.
P&E minister ni bawk, F Rodingliana chuan thu sawiin, hmeichhiate chu khawtlang leh chhungkuaah chanvo pawimawh tak an chelh tih a sawi a. Bible-a Thufingte 31:10-ah ‘Hmeichhe khawsak tha tunge hmu thei ang? A man chu lunghlu sen mi aiin a sang zawk daih si a’ tih an hmuh angin, hmeichhe tha chuan a chhungkua tichakin, chu chuan khawtlang tan pawh malsawmna a thlen thin tih a sawi.
Khuallian F Rodingliana chuan hmeichhiate chu Mizo cultural identity atana mi pawimawh an nih thu leh, chawisangtu ni zela, puan tahte uar zawk leh puan bih te chhuang taka Mizo culture pho lan zualna atan hmang turin a chah a. Hmeichhiate himna leh khawtlang ralmuang tak an neih zel nan Pathian malsawm tlaka hma la zel turin a chah bawk.