2025 FIFA Puskas Award dawng thei tur an chhawp chhuaha pet goal mawi ber chawimawina dawng thei turin Arsenal midfielder Declan Rice leh Barcelona winger Lamine Yamal an langsar hle.
Rice hian season hmasaa Champions League quarter final first leg-ah free kick atangin Real Madrid lakah goal a khung a, 3-0 in an chak a. Yamal hian Espanyol lakah kual deuhin a thun a, Barcelona-in LaLiga nomawi an lak theih phah.
FIFA Puskas Award dawng thei tur hi football ngainatute vote hmang leh FIFA mi thlan bikte chuan an thlang thin a, an hlutna hi 50% ve ve niin, chawimawina dawngtu chu The Best FIFA Football Awards 2025 sem hunah an puang ang.
2024 Puskas Award chu Manchester United winger, Chelsea-a khel mek, Alejandro Garnacho-a’n a dawng a. Everton nen Premier League-a an inkhelhah overhead kick hmangin a thun a. A hmain Premier League atangin Mohamed Salah, Son Heung-min leh Olivier Giroud ten an lo dawng tawh.
Goal thun mawi an thlan chhuahho hi August 11, 2024 leh August 2, 2025 inkara mi an ni a. Alessandro Deiola, Cagliari; Lucas Ribeiro, Mamelodi Sundowns; Kevin Rodrigues, Kasimpasa leh Pedro de la Vega, Seattle Sounders te pawh he chawimawina dawng thei tura chhawp chhuah zingah hian an tel.
October 20, 2009 atang khan FIFA Puskas Award hi Sepp Blatter awm laiin FIFA chuan an sem tan a. Kum khat chhunga goal thun mawi ber hnenah chawimawina hi an hlan thin.
Kum 2024 atang khan mipa tan chauh dawn theih turin kalphung an thlak danglam a, hmeichhe pualin FIFA Marta Award an ti thar ve thung a ni.
A vawi khatna atan chawimawina chu 2009 FIFA World Player of the Year thlannaah an pe chhuak a, a dawng hmasa ber chu Cristiano Ronaldo a ni.
Lionel Messi chu award dawng thei tura chhawp chhuah ngun ber niin, vawi sarih a hming hi a tel tawh a, chawimawina a la dawng lo thung.