A naupan laia ‘ram tana vawi khat chauh tal’ khel ve phak nih lo suangtuah thin, Lunglei tlangval, Lallianzuala (Lza) Chhangte chu India kawr hain khelmualah vawi 50 a inlan tling ta a, India chakpui zo lo mah se a mel lung phun thar avanga a lawmzia a sawi.
Mumbai City FC captain hi Thawhlehni zana Dhaka-a Asian Cup Qualification Round 3 Group C-ah khan India tana inkhel bun tantu zingah telin Shekh Morsalin-a’n minute 11-a a goal thun sut thei lovin si khat faiin an tlawm haw a. India tan chanchin lawmawm ni lo mah se Mizo tlangval tan erawh a ram tana a vawi 50 inkhelhna a nih avangin a hlu hle tho.
Kum 28 mi, Lza hian Nilaini tlai khan a Facebook account-ah, “Ka thlir kir a, mipa naupang, ram tana vawi khat chauh tal khelh phak nih lo suangtuah thin kha ka hre reng lo thei lo va. Pathian khawngaihna zarah chu mipa naupang chu a lo puitling ta a, vawi 50 hial a tlin phak ta,” a ti.
“Hun chhuanawm, lawmna hun sawm nga a ni a. Ram tana ka khelh apiang hian thawnthu a keng tel a, pakhat zel hian he zinkawng hi malsawmna a nihzia min hriatchhuahtir a ni,” tiin a tar lang bawk.
Kum 2015 atanga India tana inlan, Lza hian a football zinkawng hi a chang chuan a awlsam lo va, rinhlelhna leh dik lo tak thil a thlen changte a awm thin tih pawh a tar lang a, “Heng zawng zawngah hian Pathianin min kalsan ngai lo,” a ti a. A chhungte leh a thian tha bikte pawhin an chawi sang thin tih a tar lang bawk.
Kum 2023 leh 2024-a kum zawna AIFF Men’s Player of the Year chawimawina dawng thei, Lza hi India under 19 tana a khelh hnuah 2015 SAFF Championship khel tura koh a ni a. Senior team tan hian December 25, 2015 khan Sri Lanka an hmachhawn tumin minute 77-ah Robin Singh a thlak a, hei hi India kawr haa a inlan hmasak ber a ni.
Hemi hnuah hi chuan thlauh thlak a ni ta ngai lo va, Igor Stimac-a’n India a enkawl lai atanga bul tan kha a hnua India team enkawltu pahnih, Manola Marquez leh Khalid Jamil-a te pawh an rinrawl berah an hmang zui ta zel a ni.
FPAI Indian Player of the Year 2023 Lza hian India tana vawi 50 a inlan tawhah hian goal kua a thun tawh a ni.