Ruihhloin nasa takin kan ram min run a, kan thalaite nasa taka nghaisain, chhungkaw tam tak a tikehchhe mek bawk.
Heti taka ruihhlo hluarna kan ni chho mek ta mai hi a veiawm a, sorkar pawhin mutmawh hnarmawhah nei nasa zel bawk teh se.
Khawpui chhung chawlhna hmun tin deuh thaw hi en ila, thalai rual, ruihhlo bawiha tang tih hriat ngawih ngawih an lo awmkhawm far zel tlangpui a, hmun ualau laia lo inchiu ta ngawng ngawng hmuh tur an awm fo ta maite hi a va veiawm tak em.
Kan khawpui laili lai taka awm Vanapa hall kawt leh a sir velte hi kumtluanin ruihhlo timekte khawmpuina hmun hi a ni ringawt tawh mai a, kan khawpui hmel an tibal tawh tak zet.
He lai kal pelh apiang hian a ruihhlo ti lo zawkte hian inthlahrung tak chunga kal pelh an dil a ngai tawh a, a tawp kumtluan tawh mai hi a lungchhiatthlak zawk chu a ni.
Ruihhlo ti nasate phei hi chuan a ti ve dangte nen inpawhna an nei thuai a, inpekna leh a awmna hmun thlengin an hre thlip thlep tawh thin.
Chutiang a nih avang chuan khawpui laili lai a ni emaw, an awmkhawm let let tawhna hi chu anmahni sawi dan takin ruihhlo an vawrhna hmun a ni tlangpui thin a, a ti ve lo leh naupang zawkte tan phei chuan hmuh hrehawm a ni tawh a ni.
Sorkar hian vei lehzual se la, duty tur a khat tawkin dah reng thei se a va tha em. Khawpuia ruihhlo zalen leh a titute zalen lutukte hi hnawh bo dan zawng thuai teh se.