Chief Minister Lalduhoma’n Mizoram State University hmunpui tur chu Lungleia dah tum a nih thu a sawi.
Ningani khan Lunglei High Powered Committee (HPC) chu an chairman, Chief Minister Lalduhoma hovin High Powered Committee Conference Hall, Lungleiah an thukhawm.
Thutkhawmah hian chief minister chuan Lunglei mipuite duh em em, Mizoram State University hmunpui tur hi Lungleia dah tum a nih thu a sawi a. Mizoram State University Bill, Assembly-a lo pass tawhah Aizawlah a hmunpui dah tura lo tihfel vek lo ni mah se, Lunglei leh chhim lam mipuiin Lungleiah awm se an duh tih an hria a, chuvang chuan dan chu a tul anga siam that leh mai pawh huamin Lungleiah a hmunpui dah hi an tum ta tih a sawi.
Thutkhawmah hian Lunglei Bypass Road sialna tur hmalakna an thlir ho va, a bawhzui zel dan tur an rel a. Serkawn Bazar Shed sak thar thu te, Lungleia Cooperative Training Centre din te, Govt. Lunglei College tihhmasawnna tur te an sawi ho va. Mizoram chhim lamin airport a neih ve theihna tura hmalaknate pawh sawiin chief minister hian chhim lam leh khawchhak lama airport siam belhna tur ram thlithlai mek a nih dan a sawi fiah bawk.