Aizawl: Toursim Minister Lalnghinglova Hmar-in Nilaini khan Goa Chief Minister Pramod Sawant leh Tourism Minister Rohan Khaunte-te chu Goa-ah a kawm a, tourism hmasawnna tura state pahnih thawh dun chungchang a sawipui bakah Goa-a Mizo leh hmarchhak mi chengte hamthatna turte a thlen.
Lalnghinglova chuan Mizoram chu khualzinte tana pan chakawm leh leh mawi, tourism lama hmasawn mek a nih thu a sawi a. A ram leilung mawina bakah tlang leh ruamte chu adventure tourism leh sports tourism tan pawh remchang leh theihna zau tak nei a nih thu sawiin, Goa chu India rama tourism lama a hmahruaitu a nih angin state pahnihte thawhdunnain hmasawnna a thlen a beisei thu leh Goa atangin thil tam tak zir theih a nih tur thu Goa chief minister hi a hrilh.
Lalnghinglova Hmar chuan Goa Mizo Welfare survey atangin Goa-ah Mizo 1,500 dawn an awm thu a sawi a. Goa chu Mizoram mai bakah hmar chhak state dang thalai sing chuang tana eizawnna siamsaktu a ni chu lawmawm a tih thu sawiin, heng hnathawkte himna tur leh mamawh huna an koh theih tur Goa sorkarin siam se tih rawtna a thlen bawk.
Goa chief minister pawhin tourism lama state pahnihte thawhhona chu a taka kalpui theih a nih tur thu a sawi a; Mizo leh hmarchhak atanga hnathawkten harsatna an tawha an biakpawh tur Chief Minister Office-ah a ruat nghal thu, Mizoram Tourism Minister a hrilh.
Goa Tourism Minister Khaunte nen an inkawmnaah, state pahnih tourism hmasawn nana thawh dun theihna hrang hrang an sawi dun bawk.
Lalnghinglova Hmar hian Nilaini zana Goa Mizo Welfare-in ‘Zo zan’ an buatsaih chu a hmanpui bawk.