Zirtawpni zanah khan Mixed Martial Arts event ropui tak chu LPS buatsaihin LPS Arena, Folkland-ah neih zawh a ni.
9th Mizoram State Mixed Martial Arts Championship 2025 hi Thawhtanni zan atanga neih tan niin, State Championship bik chu Thawhtanni zan atanga neih tan nghal a ni a. Nilaini zanah State Championship chu zawh fel niin, Zirtawpni zan bikah Mizoram Fighting Championship neih a ni thung a, North East state dang atangin mi pathum an inlan nghe nghe a. He event hlawhtlin theih nan hian Hotel Platinum, RTZ Enterprise, Shop 19, Zo Sport leh Netsurf te chuan an sponsor a ni.
Zirtawpni zanah hian bout 7 a awm a, bout hmasa ber super welterweight category-ah Lalhriattira chuan split decision-in HMS Dawngzuala a hneh a. Bantamweight bout-ah Israel Lalrinawma chuan Lalnunpuia chu split decision hmangin a hneh bawk a. Lalrinawma hi Nunpuia hneh thei hmasa ber a ni ta nghe nghe.
Bantamweight bout dangah Lalramsangliana chuan submission (arm bar) hmangin Lalrindika a hneh ve leh thung a, lightweight bout-ah David Lalmalsawma chuan Aldrin Vanlalruatsanga chu split decision hmangin a hneh bawk a. Biaklawmthara chuan strawweight bout-ah unanimous decision-in Gandhilal Debbarma a hneh a ni.
Co-main event-ah featherweight fighter tha tak pahnih an inlan a, unanimous decision-in Lalnunsanga chuan Thangsuanmuan a hneh a. Bul an tan tirh phat atangin Nunsanga chuan takedown tumin a nawr viau a, wrestling thiam zawk a nihna hmang tangkaiin a tumpui Manipuri fighter Thangsuanmuan lakah hnehna ropui tak a chang thei.
Main event-ah Reyan Gogoi chuan unanimous decision-in Lalhmangaihzuala lakah hnehna a chang a. Mizo fighter Lalhmangaihzuala chuan round an tan chiahin a takedown nghal a, hnuai lam atangin Reyan Gogoi a rawn tho vat thei thung.
Hneh loh la nei miah lo Reyan Gogoi chuan a san zawkna hmang tangkaiin low stance-ah ding chungin a hnek chhuak leh thin a, BJJ style ngata khel Hmangaihzuala chuan hnaih chilh a tumin left hook nalh tak a lo dawng leh thin.
Round tir lama Hmangaihzuala’n a takedown tih loh chu ‘striking game’ an khel chho a, minute tam a awm tawh lo tihah Hmangaihzuala rawn che tha deuh a, round hmasa lama a chet chhiat deuh takah hnehna a chang zo ta lo a, Assamese fighter Reyan Gogoi chuan unanimous decision hmangin hnehna a chang ta thung a ni.