- K. Hmingthankaia
Khawpui chhung traffic movement mawi chawimawina Mizoramin a dawn thu sawi pahin, vawikhat mah ka sawi tawh lovang ka tih tawh chu ka’n sawi tel leh tho ange.
Khiti khian a thupui khi ka’n ti deuh khawl tawh a nih khi. Vawi tam tak na deuh deuh leh a ruh lang, fiah tak takin city bus-ho stand-a an ding rei thin lutuk hi ka lo sawisel tawh a. A kaihnawih department leh City bus owner association thlenga ka biak tawh dan chipchiarte pawh ka ziak tawh thin a ni. Mahse, vawiin thleng hian chu’ng chuan awmzia a la nei thei ta chuang lo a nih hi.
Ka sawi zin tawh em avangin vawikhat kha chu sawrkar khan min rawn tihder, tunlai tawng takin min rawn prank a. September ni 1 2025 atangin city bus-te chu stand-ah passenger chhuk leh lawn chhung bak din phal a nih tawh loh thu an rawn chhuah ta a ni. Chu chu thla hnih chhung enchhinna atan an ti a ni. Mahse, chu thupek chu city bus-te chuan nikhat chiah, September ni 1 2025 ni chauh chu an zawm a, chumi ni chiah chauh chu sawrkar pawhin a en uluk ve deuh a ni.
Kei lah chuan an ti tak tak tawh dawn emaw tiin, ZPM sawrkar chunga lawmthu sawina te kha chanchinbu lamah te ka lo ziak hman thawt thawt leh ta nghala, ka va inchhirin ka va zak tak em.. Ka zah em avang leh ka tlawmngaih em avanga State Trasnsport Authority hnena ka kal thu leh, Transport Director nena kan inkawm dan thute, chumi avanga Traffic SP hmuh ka tum pawh ka thulh tak thu te ka rawn sawi leh tawh kha.
Mahse, hemi thuah hi chuan ZPM sawrkar lakah hian ka beidawng tawh a. A kaihhnawih dept. pahnihte hian tihngaihna an hre thlawt lova, Minister pahnih, Home leh Transport changtute pahnih hian luhlul chhuahin min inchhutngeng khum lui ni berin ka hre ta a ni. Sawrkar hmasa lama ka lo beidawnpui tawh kha tun sawrkarah pawh beisei tur a awm leh tak lovah chuan, sawrkar thar kan nghak leh mai a ni ang chu.
Tun hnai, November ni 7-9 chhunga Ministry of Housing and Urban Affair bul tuma Gunguram, Haryana-a 18th. Urban Mobility India khawmpui an neih tumin Mizoram chuan khawpui chhunga traffic movenent mawi chawimawina a dawng a ni.
He chawinawina kan dawn theih chhan lian ber chu kan traffict police-te inpekna thuk tak leh an thawhrimna nasa tak vang a tih theih anga, kan Mizo nun ze mawi kan la chhawm nun zel vang leh kan hawihawm vang leh, mipuiin thu kan la awih vang pawh a ni bawk ang. A hmuna lawmman zuk dawngtu tak kha UD&PA ni mah sela, kan vai aiawh, Mizoram tan a ni tih kha hre reng ila.
Khawpui traffic zim leh tawt tak kara vairam anga horn kan hmet ri ve tuar tuar ngai lo hi hnam dangten mak leh mawi an tiin min fak a ni ber mai. Hei hian kan hnam, Mizo nunphung leh nihna leh kan mizia thui tak hnam dangte laka a tihlan avangin, he chawimawina hi chawimawina dang aiin a hlu dangdai bik em ema, inchhuanna tham a ni.
Mahse, hetia chitin hnamtin kan inpawlhsawp lutuk chhoh zel leh, mahni hmasial leh duham lutuk, engmah pawisak nei lo, mawi leh awm pawh ngaihtuah pha lo, mahni hma zawn chauh ngaihtuahtute kan pun chhoh zel chuan, he kan nun leh chetdan mawi tak pawh hi a la bo mai ang tih a hlauhawm tawh khawp mai. Nakinah chuan vairam ang chiahin, mahni hmasial vang liau liauvin, awmze nei tur miah loah pawh horn kan la hmet ri chuah chuah lovang tih pawh a sawi theih tawh loh hi. Tuna Ambulance hoin sirene an tihrik ruai ruai thinte pawh hian a tih vairam tawh em hi. Heng tiri ho nazawng pawh hi tul lutuk leh tak tak pawh a ni vek kher ange maw le? Inbumna thil eng eng emaw pawh a awm thei mai lo maw tihchang ka nei thin. City bus-ah pawh kan Zonun ze mawi chu a bo tan ta deuh der a nih hi.
Engpawh nise, kan khawpui chep tak kara traffic fel taka enkawltu police-te thluak leh taksa hah zia hi i fak fo teh ang u. Anni vang hian kan nitin nun hi a kaltluang hram hram thei a. Anni vang hian kan nunna leh kan na tur hi kan la him hram hram zel a nih hi. Second khat lek pawh pakhat chauh pawh lo inthlahdah vaih sela chuan, mihring leh motor-in chhiatna nasa tak kan tawk thei reng a ni. Tunhma chuan traffic police-te hi mipuiin kan hlauva, inhnaihtir kan duh lo thin. A chhanchu, kan harsatna min sut kiansaktu nilovin, harsatna min siamsaktu leh pawisa mi chawitir dan ringawt ngaihtuahtute hmuha kan hmuh thin vang a ni. Tunah chuan, traffic police-te hi mipuiin kan hlau tawh lova, kan zah tawh zawk a ni. Harsatna min siamtu ni tawh lovin, kan harsatna min sut kiansaktu an lo nih tak zawk avang hian, mipui pawhin enge maw kan harsatna hlekah chuan traffic police-te kan bel ta zel zawk a nih hi. Kha’ng traffic police tawng leh pamhamho, chhan hrang hrang vanga tuna awm ve ta lo ho kha ka mitthlain a la hmu fo thin. Tunlaia mite nen chuan inang lo tak an ni.
Mahse, ti leh teh ang aw. Heti khawpa mipui leh motor tam lutukin kan kawng intawm tereuh te leh tlem tak hi hman daihzai leh tluang taka chet vel kan tum theuh lai hian, engvanga kan kawngpui pawimawh lai apianga city bus lianpui puiten nitin nileng thaka an stand kan la awh hnawk luihtir tlat zel mai chu le?
Khawnge Home department leh Transport deparment-te kha in awm tak? Khawnge Home Minister leh Transport Minister kha in awm tak? Heng city bus lianpui pui hoin kan khawpui kawng chep tak an tih hnawk zia hi in hmu ve lo em ni? Motor jam a tih tam phah zia leh mipui chet vel a tih harsat ziate hi in hmu ve ngai lo em ni? Chanchinbua vawi tam tak kan sawi tawhte hi in la hmu duh lo nge, in luhlul khum zawk?
Nikhat lek, September ni 1 kum 2025 ni chauh in thupek avanga an din loh ringawt pawh khan mipuiin nuam kan tih thute, traffic jam a ziaawm thute police ngeiin an sawi nghalte kha in lo hre ve duh nange? A that leh that loh thla 2 kan enchhin dawn in tih kha nikhat chauh in thu an zawm chung pawhin, kawng hrang hrangin a thatna kan hmu nghal a ni lawm ni? Mahse, a tuk atangin an dan pangngai bawkin city bus-te chu an khawsa leh si a, eng sawrkar thupek nge ni ngai? A thuhrimah hei, thla 2 chu a liam daih tawh a, engtin nge in tih zel dawn?
Kawng pengthuam leh pawimawh lai leh mipui tamna lai, kawng zim bawk si, Kulikawn, Khatla, Treasury square, Zodin, Upper bazar, Zarkawt, Chandmari leh Bawngkawntea nunphung tibuai lutuka city bus-te an stand-a ding hnawk nitin nileng ziahte hi hnawk in ti ve lo em ni? Kei chuan hnawk ka ti a ni.
Aizawl traffic jam nasa lutuk tih ziaawm dan tur nasa taka buaipui inti reng siin, tlem tala tih ziaawm theihna leh mipui chet vel tih awlsam theihna awm reng ti duh tlat si lo sawrkar chu sawrkar chak tak kan ti tho zel angem le?