Aizawl: BSF leh Excise and Narcotics Department tangdunin Inrinni zing khan Chanmari West-ah Methamphetamine Kg. 5.89 leh Heroin Hawng thum an man.
An thu dawn bawhzuiin BSF leh Excise and Narcotics Department tangdun hian, Zirtawpni zan khan Seling leh Tuirial inkarah Joint Operation neiin, ruihhlo dap beihpui an thlak a. Ruihhlo tawlhna atana hman ni ngei hriat lirthei pakhat chu an endik a. Lirthei chhungah hian ruihhlo hmu lo mah se, lirthei-a chuang mi pahnih chu thu an zawhfiahna atangin ruihhlo hi Aizawlah lo petu tur an awm ni-a an sawi avangin an mi hrente nen hian Aizawl lam an pan a. Inrinni zing khawvar hma, zing dar 4:30 khan Chanmari West-a chenna in pakhat chu an dap a, in-a lo awm mi pahnih kut atangin Methamphetamine kg. 5.89 leh Heroin Hawng thum (gram 41) hi an man a ni.
Ruihhlo leh a neitu-a puh mi pali zinga pahnih chu hnam dang an ni a, midang pahnih chu Myanmar mi an ni a, heng mite hi Excise & Narcotics Department-in lain, ND&PS Act hmangin thubuai an ziak lut a ni.