School Education Minister Dr Vanlalthlana’n tuna academic session-a third term atangin Class V-VIII zirlaiten zawhna inang an chhang dawn a, hei hian zirnaah danglamna a siam an beisei thu a sawi.
He thu hi Inrinnia Govt Khawrihnim Primary School Centenary lawmna, Khawrihnim Primary School tual zawla neihah khuallian nia a hmanpuinaah School Education Minister hian sawiin, “Kan ram zirnain hma a sawn theih nan tun session-a third term atangin zirlaiten zawhna in ang an chhang dawn a, Government, Deficit leh Adhoc Grant in aid school, Class V-VIII zirlaiten an chhang dawn a, hei hian zirnaah danglamna a siam beisei a ni,” a ti.
Minister chuan Govt Khawrihnim Primary School kum 100 a tling chu a lawmpui thu leh mi chhuanawm tak tak an chhuak chu lawmawm a tih thu a sawi a. Zirna lama tan lak a tul thu sawiin, khawtlang hruaitute, tlawmngai pawlte leh nu leh pate tanrual a ngai a, veng chhung an tanrual chuan MLA te pawhin an hawisan thei lo va, sorkar leh mipuite tanho a ngai a ni, a ti bawk.
He hun a hmanpuinaah Minister Dr Vanlalthlana hian Centenary hriatrengna lung a hawng bawk.
Khualzahawm Prof H. Lalthanzara, Principal, Pachhunga University College pawhin he hunah hian souvenir a tlangzarh a. Angela Zothanpuii, Director, School Education Department; Caroline Zoramthangi, Director, SCERT leh C. Lalthanzira, State Project Director, Samagra Shiksha te pawhin thu an sawi a ni.