Aizawl: Union Ports, Shipping & Waterways Minister Sarbananda Sonowal chuan Mizoramah luidunga inkalpawhna tha a awm theih nan Mizoram lui lian pathumah hmalak a ni dawn tih sawiin, Tlawng lui leh Chhimtuipui zirchian mek a nih thu a sawi.
India Maritime Week 2025 puala tun hnaia hun hmanah, Inland Waterways Authority of India (IWAI) leh Assam sorkar bakah private company ten luidunga inkalpawhna tihhmasawnna tur project atana thawhdunna MoU an ziahnaah he thu hi sawiin union minister chuan, Mizoram chu hmarchhak bial luidung hmasawnna ah a tel ve tih sawiin, hei hian danglamna nasa tak a thlen dawn tih a sawi.
Union minister chuan Mizoram luidung zingah Tlawng lui leh Chhimtuipui chu zirchian mek ani tih sawiin, hmanraw bun nan Tlawng luiah Rs nuai 89 leh Chhintuipuiah Rs vbc 1.42 ruahman a ni, a ti a; Lunglei district-a Khawthlangtuipui leh Tuichawng inkar inkalpawhnaah Rs vbc 9.82 ruahman a nih thu a sawi a. He project hian lawng chawlhna hmun lian lo chi pahnih a huam tel dawn a ni.
Luidunga inkalpawhna chuan ram thenawmte nena insumdawn tawnna kawng lian zawk a hawng dawn tih sawiin union minister chuan, India-in luidunga inkalpawhna tihhmasawn kawngah hmarchhak chuan hmun pawimawh tak a chang tih sawiin, tualchhung eizawnna kawngah pawh hmasawnna tam tak a thlen dawn a, kawng hrang hrangin heng biala mi chengte tan hamthatna a awm phah dawn tih a sawi bawk.
Union minister hian a department chanah review meeting neiin, hetah hian hmarchhak biala tun hnaia project lian hrang hrang 15 an thawh tur tar lan a ni a, heng zingah hian Mizoramah project pathum awmin, a dang hi hmarchhak state hrang hrangah thawh tur a ni ang.
Inland Waterways Authority of India leh Heritage River Journeys Pvt. Ltd. inremnaah hian luidung inkalpawhna tihhmasawn bakah heng biala luidung bula mi chengte chhawr tangkai tur ngaihtuahsak te a ni a, zinmite hmuh nuam tur hrang hrang chhawp chhuah te a ni bawk.