Aizawl: Govt. Mizo High School, Aizawl chuan an laboratory, Atal Tinkering Lab atanga an siam chhuah, Hospisafe (Internal Air Quality Monitoring Device) pahnih chu Zoram Medical College & Hospital hnenah an hlan.
Hospisafe hi Govt. Mizo High School aiawhin Rev. Dr. K. Thanzauva, Consultant, School Eduation leh Angela Zothanpuii, Director School Education ten Zirtawpni chawhnu khan ZMC&H Medical Superintendent Office-ah an hlan a. ZMC&H aiawhin Prof Lalnunmawii Sailo, Medical Superintendent leh Prof T. Vanlalhluna, Sub Dean, Hospital Administration ten an lo dawng a ni.
Govt Mizo High School Headmaster Hmingchungnunga chuan Atal Tinkering Lab an neih dan leh kalpui dan a sawi a. Air Quality Monitoring Device hi kum 2023-a exhibition – THUL an neih khan a demo an entir tawh thu leh hetiang device hi hmantlak tura an siam thu ZMC&H ten lo hriain, siamsak tura an ngen angin an siamsak ta a ni tih a sawi.
Dr. H. Lalrinawmi Teacher, Incharge ATL chuan ZMC&H a hmantlak tura siam a ngaih avangin an beih nasat thu leh a part pawimawh thenkhatte chu USA atanga an lei a nih thu a sawi.
Class IX zirlaite’n khawl hnathawh dan an entir a. Hetiang khawl hi research tih nan an siam tawh thin a, tuna an siamchhuah hi chu hmun danga an siam ang ni lo vin, a thar hlak a duan chhuah (patent) liau liau a ni. Damdawi in himna atana hman tura siam a nih avangin a hmingah pawh Hospisafe an vuah a ni.
Hospisafe khawl hian room chhung temperature, humidity, carbon dioxide leh boruak a thil nawite a zirchiang thei dawn a. Hei hian damlo enkawlna kawngah te, pindan chhungah damlote tana boruak tha a awm theihna tura room design tha zawk siam kawngahte tangkaina tam tak a nei thei dawn a ni.
India ramah ATL hi Niti Ayog funding – Atal Innovation Mission hnuaiah 5,000 chuang a awm tawh a. Govt. Mizo HS hian January 27, 2022 khan an hmang ve tan a. ATL of the Month Certificate vawi thum an dawng tawh a ni. Mizoramah ATL nei school 15 a awm bawk.