Aizawl: Mizoram leh Telengana chuan sports hmasawnna tura thawhhona thuthlung an ziak.
Thawhhona thuthlung hi state pahnih sorkar official-ten an ziah hnuah Inrinni zan khan Telangana Governor Jishnu Dev Varma leh Mizoram Sports Minister Lalnghinglova Hmar-ten an inhlan tawn a ni.
Inrinnia ‘Telangana – North East Connect: A Techno-Cultural Festival’ neihah sports minister hian ‘Spirit of the Game: Connecting Telangana and the North East’ thupui hmanga discussion panel-ah thuin, ‘Mizoram as a future sports powerhouse’ tih thupui hmangin thu a sawi a. Mizoram chuan hmathlir neiin sports a kalpui chho mek tih sawiin, football leh discipline thenkhata an hlawhtlin anga Olympic sports danga hlawhtlin dan kawng an dap mek tih a sawi.
Sports minister chuan Emerging Mizoram Sports (EMS) kalpui a nih dan turte sawiin state pum dapa talent zawn chhuah hna an thawh dan turte leh, chumi kawngah Telengana nena infiammite intlawh tawn, coach inkal pawh tawn leh Telengana state-in sports hmunhma a neihte Mizoram infiammiten man chawi loa training-na atana an hman theih dan turte rawtna a thlen.
Sawihonaah hian India rama infiammi langsar, badminton tana sulsutu, Telengana mi, Pullela Gopichand, Olympic silver medalist Manipur lam mi, Mirabai Chanu, Sikkim football superstar Bhaichung Bhutia leh mi dangte an tel.