England captain hlui, Wayne Rooney-a’n tun season khelh tawh china Premier League-a che tha player hming pathum a sawi zingah chuan Arsenal striker thar, Viktor Gyokeres a tel.
‘Tun season-a Premier League player che tha i tihte han sawi teh’ tih an zawhna chu Rooney chuan, “Semenyo, Mbeumo leh Gyokeres te,” tiin chuan a chhâng.
Bournemouth forward Antoine Semenyo hian league-ah vawi 11 a khel tawhah goal ruk a thun tawh a, a thiante thun tur vawi thum a siamsak tawh bawk a, vung tak Bournemouth an kal theih nan a thawhhlawk hle.
Manchester United forward Bryan Mbeumo hian Old Trafford club a zawm hnuin khelh chhiat a nei vak lo va, a insiam rem nghal a ni ber a. League-a vawi 11 a inlanah goal nga thun tawhin mi dang siamsak vawi khat a nei tawh bawk.
Swedish striker goal thun thei tia hriat hlawh, Gyokeres hi a khelhna hmasa ang chuan goal a khung pur pur lova, goal thun tam lamah chuan beisei a la pha rih chiah lo tih phat theih a ni lo va; mahse Arsenal goal nawr tinatu ber a ni.
A tlan thei a, tharum a ngahin a khawng hle a. Arsenal-in hma lamah ball an kalpui a, chutah chuan an khingpuite tan ven hi a ngai hle thin a, defender pakhat tana hup beh theih a ni lo.
A sir atang te, a hnung deuh atangten player dangten ball luhpui a, a laia na taka lo tal, tharum ngah si, goal khung thei bawk si, Gyokeres a lo awm thin hi lehlam tan chuan a ‘hnawk’ takzet a ni.
Kum 27 mi hian vawi 11 inkhelh atangin goal li a thun tawh a ni.