UD&PA-in Bawngkawn leh Durtlang inkar kawngpui chhehvel chu Rs vbc 15 vel sengin an chei dawn.
Bawngkawn leh Durtlang inkar kawngpui chhehvel chu UD&PA Department-in an chei dawn a, hnathawktu tur zawngin tender chhuah mek a ni a, hna tan atanga kum khat chhunga zawh beisei a ni.
Bawngkawn leh Durtlang inkar kawngpui chheh vel chei tur hi ruahman dan chuan khualzinte tan pawha tlawh chakawm ni tura siam tum a ni a, khawthlirna, naupang intihlimna, open gym leh mipui chawlh hahdamna hmunte siam tum a ni.
Leitan lai tak pawh lung tla vanga harsatna a thlen loh nan siam that tur a ni a, Mizo hnamzia tar lang thei hrang hrang bakah thing leh mau hmanga cheibawl tum a ni a. Hei bakah hian Leitan lian leh Synod Hospital bul, Leitan te inkar siam nan Rs nuai 120 vel ruahman a ni bawk.
Kawngpui chhehvel chei tur hi Inrinni tuk khan UD&PA Minister K. Sapdanga’n fangin, Bawngkawn atanga ke-a kalin Leitan thleng a fang chhuak a. An ruahmanna chu kawng tihzauna tur a ni lo tih sawiin, tuna a nih ang anga tangkai taka hman a, chei mawi tum a nih thu a sawi.
K. Sapdanga chuan, helai kawngpui hmun thenkhat chu in sak phal lohna, protected area a ni chungin mi thenkhat dan zawm lova kawng sira in sa an awm nual a, heng in sakte hi kawngpui area a nih hlawm avangin dan ang taka hmalak tum a nih thu leh tuna an hmalakna tur dala in sa leh ram neitute pawh tha taka dawrin harsatna thleng lova chin fel theih an beisei tih a sawi.