Aizawl: ZPM Vice President C Lalnunnema chuan party office atana Assam Rifles biak in hmun neih tum anga ZPM party puhna chu dawt a ni tih sawiin, tun thlengin office hmun tur an la lei thei lo tih a sawi.
ZPM party in nimina an party pisaa chhung inkhawm an neihah C Lalnunnema chuan, ZPM party hian Assam Rifles ram chhuahsan chhunga biak in hmun hi office atana neih tumna emaw, hman tangkai dan tur chungchangah emaw ngaih dan emaw, duh dan emaw an sawi ngai lo tih sawiin, “Sorkarin mipui aiawh zo tura a din, pawl hrang hrang aiawh telna advisory committee ngaihdan leh ruahmanna chu Mizoram mipui tana tha tawkah kan ngaih avangin kan inrawlh ngai lo,” tiin biak in hmun chungchang hi ZPM hian office hmun atana neih tum anga an puhna chu dawt a ni a, zaa zain thu dik lo a nih thu a sawi.
ZPM party hian nikum atang tawhin party office, anmahni ta ngei an neih theih nan thawhlawm thawh turin party mipui, unit leh block an ngen tih sawiin ZPM vice president chuan, “Vawiin thleng hian hmun nghet nei lovin, man chawiin mi mal in kan la luah a. Kumin kum tirah khan Building Committee din a ni,” tiin, an hotuten Building Committee Chairman-ah amah chu an ruat thu leh party office hmun tur lei chungchang chu a hre chiangtu a nih thu a sawi.
C Lalnunnema chuan Building Committee meeting hmasa berah party office hmun tur lei nan bank loan lak ni se an ti a, bank hotute pawh dawr an ni tawh a, in hmun lei tur an hmuh hunah bank loan la turin thutlukna an siam tawh tih a sawi bawk.
Member-ten theihtawp chhuahin party office hmun tur hi an zawng tih sawiin ZPM Vice President chuan, “Aizawl khawpui laili-ah kan duh avangin kan hmuh chhun te a to hlawm hle a. Unit hrang hrangte, block te leh mi mal atanga Building Fund atan an thawh khawm hi tun dinhmunah Office hmun tur leina tham a la tling lo va; chuvangin, bank loan laa ram lei chu kan tum mek a. Vawiin thleng hian party office hmun tur kan la lei thei lo a ni,” a ti bawk.