Aizawl: Union Railway Minister Ashwini Vaishnaw chuan Sairang atanga Thenzawl Railway alignment chu February, 2026 ral hma ngeia peihfel an tum tur thu chief minister Lalduhoma a hrilh.
New Delhi-a cham mek chief minister-in Thawhtanni khan New Delhi-a Railway Bhawan-ah union railway minister chu a kawm a. Chief minister chuan Thenzawl Peace City Master Plan siam mek a nih avangin Sairang atanga Thenzawl Railway alignment chu peih fel vat a tul thu thlen chu union railway minister chuan, February, 2026 ral hma ngeia peih fel an lo tum tur thu a hrilh.
An inkawmnaah hian Lalduhoma chuan Sairang atanga Guwahati thleng rel kal mek chu khualzinte awlsam zawkna turin Guwahati hi zing dar 4:30 a thleng thla hman tura a kal hun siamrem tura rawtna a thlen chu union railway minister-in a pawmsak.
Tuna Sairang atanga Delhi Rajdhani Express tlan mek hian, Delhi thleng thla turin darkar 42:20 a mamawh chungchangah chief minister chuan kawng tawi zawk zawhtir turin rawtna a thlen a. Railway minister chuan lo pawmsakin kawng tawi leh rang zawk zawhtir a nih tur thu a lo hrilh a, he kawng tharah hi chuan darkar li velin rel hi a thleng hma tawh dawn a ni.
Chief minister hian Sairang to Delhi Rajdhani Express chu khualzin an tam avangin chawlhkar khata vawi hnih tal tlantir turin rawtna a thlen bakah, Kolkata to Sairang rel, Sairang Station-a zan dar 7:45-a thleng thin chu khualzinte tana awlsam zawk turin tlai dar 3 a thleng tura siamrem rawtna a thlen a, union railway minister chuan a bawhzui nghal tur thu a hrilh.
Chief minister hian ILP tha taka kenkawh a nih theih nan leh hnam dang khualzinte awlsam zawk nan Mizoram ILP Portal chu IRCTC Train Ticket Portal-a dahluh rawtna a thlen pawh, IRCTC hotute a lo zirchian tir tur thu a lo hrilh bawk.