Khawchhak lam atanga kuhva ro tawlh vangin hun hmasa lamah kan buai viau mai a, khawthlang lamah kuhva chingtute mangangin, an tharchhuah hralhna thlengin harsatna an tawk nasa hle a, chhiatna hrang hrang thleng zuiin, kan mangang chho hle a nih kha.
Sorkar in theihtawpa hmalak intiamin, kuthnathawktute harsatna chinfel a tiam a, vawiinah chuan kuhva ching nasa Hachhek tlangdung lamah pawh an thlai hralh chhuah chuan a vang lai tawng chho mekin, kawl a eng a, Kuhva Kut hial hman tumin an inpuahchah chho ta ut ut mai.
Khawchhak lam atanga kuhva tawlh hi a tawp ta thut a ni lo a, rawn phurh thlak pawh a la awm reng. Mahse, harsatna leh ramchhunga kuhva chingtuten an chhiat phahna tur ni lo zawnga ke pen a nih tak miau avangin vawiinah chuan kuhva chingtute pawhin an thawh hah man an tel ve thei ta zawk a ni.
Hachhek biala kuhva chingtute hian pawl felfai tak an nei a, ram pum huapa kuhva chingtu pawl zinga va tel thuk lutuk pawh an duh hek lo. Anmahni remhriatna leh tha an tih angin hma an la mai a, state ramri depa awm an nih avangin an kuhva rah hralh that dan chu an thiam ang angin an zawng mai a, hei hi engemawchenah chuan a tha viau a ni.
Kumin chhunga an kuhva hralhna rate tha ta lutukte pawh hi lawmpuiawm tak an ni a, anmahni pawh an lawm a, dan dik lova chete tan kawng an khar ngam a, tawn tlang mai mai chi an ni lo hi an fakawm hle bawk.
Kuhva hmanga eizawngtute tan kawl eng zel se la, rim taka kuthnathawktute hian an thawh hah man hmu ngei zel bawk se, sorkar pawhin an lama tan reng dan leh puih dan zawng zel bawk teh se.