Aizawl: ZPM Media Chairman B Lalchhanzova chuan ZPM sorkar chuan mi tin huap rorelna an aupui chu a takin an kalpui tih a sawi.
Nimina ZPM party-in an party pisaa chhung inkhawm an neihah thusawiin ZPM media chairman chuan mi tin huap rorelna an aupui chu a taka an kalpui avangin ‘party mite duhsak ve deuh teh u’ tih chu an thudawn tam zinga mi a ni tih a sawi a. “Kan han sorkar a, thawh tur a tam hle a, party pawh ngaisak hman lovin mawngvawmba ang maiin kan tul a, sorkar kal tawhte nen chuan kan danglam,” a ti.
ZPM chuan kum nga chhunga a tam thei ang ber thil tangkai tih hman an tum a, chu chu an auhla pawh a ni tih sawiin B Lalchhanzova chuan, “Sorkar kal tawhte kha chuan kum nga chhung chuan thil tak tak a tih hman loh tiin chhuanlam an siam a, kum hnih chhunga min beisei erawh a sang hle thung. Opposition-ten en chhin sorkar tiin min au el a, anni chuan en chhin zui an ngam tawh lo niin ka hria,” a ti.
Supply minister ni bawk chuan, “Pu Lalduhoma kaihhruai ZPM sorkar lo piang ta hian kan ram tan bung thar, hawi zawng dik min chhawp chhuahsak mek a, thil chik mite chuan an hai lo,” tia sawiin term khat emaw term hnih emaw chauh sorkar hi a thlir lo va, kum 2040 vela an thlen chin tur an thlir mek a. Hun rei lo tea tihhlawhtlin theihte, nghah rei ngai deuhte, hun rei zawk thlir ngaite a awm a. MNF leh Congress rorel rei zawng kum 37 te ro an rel chuan khawvelah hian Zoram ropuizia an lantir ngei dawn tih a sawi.