December 8, 2025 khian Hachhek Bial Kuhva Chingtu Pawl (HBKCP) chuan a vawi khat nan Rengdil Sports Centre-ah Zoram pum huap ‘Kuhva Kûtpui’ an hmang dawn a, Chief Minister Lalduhoma’n a hmanpui dawn.
Kumin hian HBKCP hriatpuia luhva hralh tawh zat hi Rs nuai 5,000 a chuang tawh a, kuhva hi Assam state lamah matric ton 10,000 thawn chhuah tawh a ni bawk.
Tunah hian kuhva phun sa, a rah la thar lo leh huan thar din chho mekte pawh chhungkaw thahnem tak an awm a, kuhva huan siama eizawna hi Hachhek bial chhung mipuiten hna berah an neih tak avangin hmasawnna pawh chak taka a kal chhoh zel beisei a ni.
Hachhek mipuite hian kum 1950 khan kuhva hi ching tanin, Saikhawthlir khua chuan bul an tan a, Rengdil leh Zamuang khuain Saikhawthlir atang leh hmun dang atangtein kuhva chi la ve lehin, kum 1960-ah an ching chho ve leh a ni.
Heng kum chho velah hi chuan kuhva hi chuti taka phurpui an la tam lo hle a, chhungkaw tlemte chauhin an ching a, a chhan pawh kuhva hralhna a la awm mumal lo va, rate mumal pawh a awm lo a ni. Kum 1970 chho velah kuhva hi tualchhunga kuhva a khawra zuartute hnenah tlem azawng hralh niin, khaw thenawmahte pawh eng emaw zat chu an hralh ve thin.
Kum 1987-ah chuan kuhva huan siam an lo pung hle a, kuhva lei tur zawngtu hnam dang (majon) an chhuak tan a, huan khar leh a bag a hralh chhoh a ni ta a. Chhungkaw tam takin kuhva huan siam chu eizawnna tlak a nih hriain, kuhva huan nei an pung chak hle a, kum tinin kuhva hralh chhuah a pung zel a, hnamdang majon-te nen huan neitute indawrin an inrem a. Eizawn nan ber hman chhoh a lo ni ta hial a ni.
Hachhek bial chhungah hian khaw tinah kuhva association leh society din a ni a, heng pawl khaikhawm tur hian HBKCP chu kum 2018 khan Rengdil khuaah din niin tun thlengin Hachhek bial chhunga kuhva chingtute tan hma an lain a market-ah te, a kal kawngahte leh khawchhak lam atanga kuhva ro dan lova lut danchah kawngahte hma an la thin a, hei hian kuhva chingtute tan harsatna tawh theih tam takah a veng nia sawi a ni.