Vanduaina avanga chatuan ram pan ta boxer Lalruatdika duhthusam tihhlawhtlinsak tumin Mizo Special Report (MSR) Charity chuan hma a la a, cheng nuai chuang an hmuhsak tawh.
November 14 khan Grassroot leh Crown Boxing Promotion buatsaih Super Fighters Series vawi ngana, Battle in Mizoramah kum 20 mi Dikpuia a inlan a, professional boxing a khelh hmasak ber niin super featherweight huangah Eric Lalthangkima nen inhnehtawk taka an inhnek laiin nikhawhrelovin a tlu a, Greenwood Damdawi inah dah luh zui niin a thluakah thisen zam a chat a, a thluak vung tel bawkin November 16, zan dar 9:20-ah chatuan ram a pan a, a nupui leh a fa sen pakhat a kalsan a ni.
2024 LPS Pro Fight-a semnifinal lut Dikpuia vanduaina hian inhnek buatsaihtute leh Mizoram mipui a thawng hle a, damdawi ina an enkawlna senso zawng zawng cheng singriat chuang Grassroot leh Crown Boxing Promotion-in an tumsak bakah, Hmunpui boxer-in tum neiin boxing a khel a, in leh lo din tuma a beihna an hriatpui hnuah tanpui nan cheng singthum sanghnih an pe tel a, kum hnih chhung a kalsan tak a chhungte chhawmdawl zui an tum a ni.
MSR-in a chenna Hmunpui khuaah kal chilhin a chhui chiang a, Dikpuia hian boxing atanga lawmman a dawnte khawlin in leh lo din ngei tumin hma a la tih a hmuhpui a, a tum tuhna hriatpuiin vanduaina tawka hun lo taka chatuan ram a pan tak avangin a thil tum tihlawhtling tur hian MSR Charity chuan hma lakpui ngei tha a ti a, a chhungte leh Hmunpui khawtlang hruaitute rem tihnain inrinni zan atang khan vehbur a khawnsak a ni.
Gpay hmangin tanpuina a khawnsak a, transaction bithliah chin avangin harsatna tawk mah se cheng nuai chuang a lut tawh tih MSR Charity hotupa, Vanneihthanga chuan a sawi a, transaction avanga harsatna awm lo turin buaipui a ni a, an khawn hun chhung tur leh an pek dan tur chu committee-in a la ngaihtuah dawn a, Hmunpui Village Council kutah hlan a ni ang tih a sawi.