Aizawl: Mizoram Larsap General (Dr) Vijay Kumar Singh-a’n Mizoram Bharat Scouts & Guides (MBS&G) in State Award a pek theih sang ber, Rajya Puraskar Award/ Governor’s Award dawng tura thlan chhuahte hnenah Rajya Puraskar Award a hlan.
Thawhlehnia Raj Bhavan, Durbar Hall-a award hlanna inkhawmah larsap General (Dr) Vijay Kumar Singh chuan, Rajya Puraskar Award dawngtute chhuanawm a tih thu sawiin, hmasawnna tur tam tak an la neih avangin an thlen chinah tawp mai lo va, ram pum huap Scouts & Guides chawimawina sang ber, Rastrapati Puraskar chu Mizote theihna, khawtlang inenkawlna leh nunphung thlirin dawng thei tur tam tak an awm theih ngei a beisei thu a sawi.
Larsap chuan Scouts & Guides pual camp buatsaih leh classroom atanga an thil zirte chuan khua leh tui tha chherchhuah kawngah awmze thui tak a neih thu sawiin, an thiamna leh hriatnate chu faina, chhehvela thil awmte ngaihsakna leh khawtlang rawngbawl sak nana hmang turin a fuih a. Mizoram Bharat Scouts & Guides Chief Patron a nih angin Mizoram Scouts & Guides thanlen zel nan theihtawp chhuah a tum thu a sawi bawk.
Rajya Puraskar Award dawng thei tur hian Tritiya Sopan Level chin tal thlen a ngai a, scouting/guiding skill-a thiamna tha tawk tak nei, vantlang rawngbawlna leh hmasawnna kaihhnawih hmalaknaa tel tawh bakah Rajya Puraskar Scouts & Guides Testing Camp paltlang tawh an nih a ngai a ni.
Tun tumah hian 2024 batch atangin Mizoram pumah Scouts & Guides 149 (Scouts 64, Guides 85) ten chawimawina an dawng a ni.