Aizawl: MPCC President Lal Thanzara’n kuthnathawktute leh mi harsa zawkte tan NLUP tha zawk leh changtlung zawk sem leh turin ruahmanna an siam mek tih a sawi.
LADC inthlanpui neih tura campaign-a Lawngtlai a pannaah, Lunglei North bial chhunga khaw hrang hrangte a tlawhnaa an party mite nena an inkawmnaah thu sawiin MPCC President Lal Thanzara chuan, Dampa bial by-election neih zawk takah an duhthusam result an nei lo va, An bialtu MLA boral avangin a ralna tana MNF chu mi tam takin an vote a, sorkarna chelh mektu ZPM pawhin kum thum vel sorkarna an la neih avangin an tan chet a harsa a. Chutih rualin, Congress party an thawkrim ber a, an thawhho thatne leh an inlungrualna chu kum 2028-a Congress sorkar lehna tur anih thu a sawi.
Lal Thanzara chuan mi thenkhatten sem policy an sawisel chu a dem loh thu sawiin, “NLUP kha sem policy a ni ngawt lo va, mi rethei, mahnia bul tanna nei lote khai chhuahna tur leh eizawnna bul an tan theihna atana ruahman a ni. Vawiin ni thlengin NLUP avanga eizawnna tha tak tak nei, hlawhtling tak tak an awm tih kan hriat hian NLUP sem leh chakna min neih tir a. Kuthnathawktute leh mi harsa zawkte tan NLUP tha zawk leh changtlung zawk sem leh turin ruahmanna kan siam mek a ni,” a ti.
Congress sorkarin Mizoram tan hmasawnna rotling tam tak an chhawp chhuak tih sawiin Lal Thanzara chuan, “Hei hi kan la duhtawk mai lo va, Mizoram tana hmasawnna lian zawk thawk tura an inbuatsaih zel a. Mizo mipuite hian party pathumte hi min enchhin tawh a. Min hre chiang tawh. Tu sorkarin nge hmasawnna thlen tam ber, tu sorkarin nge leiba nei tlem a, leiba awm sa rul tam ber tihte hi an hriat tawh avangin mi tam tak Congress Party-ah an lung a leng,” tiin, ZPM enchhin duhtute pawh inchhirin Congress party-ah an lawi lut mek zel niin a sawi bawk.