Aizawl: Zoram Driver’s Union (ZDU) buatsaih lirthei khalhtute tana fimkhurna hapta ‘Road Safety Week’ chu Thawhlehni khan Transport Minister Vanlalhlana’n a hawng.
Chaltlang Lily Veng, Sairang Road-a ZDU pis-a hawnna inkhawmah transport minister chuan November 25-December 1, 2025 chhunga Road Safety Week hman tur chu mipuite hnena fimkhurna thuchah leh mawhphurhna inhriattirna hun pawimawh tak a nih thu a sawi a. Road Safety chuan lirthei khalhtute chauh huam lo vin, kawngpui hmangtu zawng zawngte a huam thu leh fimkhurna kawngah pawh mi tinin mawh an phurh thu a sawi.
Minister chuan lirthei khalh laia rilru pek tawk loh te, hmanhmawh luat avang vanduaina tawk leh nunna chante an awm thin chu pawi a tih thu a sawi a. Sorkar chuan vantlang himna tura dan a siamte chu mi tinin ngai pawimawh zel turin a chah bawk.
Fimkhurna hapta hawnna inkhawm hi ZDU President F. Dosanga’n a kaihtuai a ni a. Mizoram hmun hrangah a rualin Road Safety Week hawnna hun hi hman a ni.
ZDU hmalaknain lirthei khalh chungchanga Fimkhurna Hapta hi kum 1981 atang khan Drivers’ Week tih hming puin hman tan a ni a. Kum 2007 atangin Road Safety Week tih a thlakin, kum tin hman thin a ni.