Aizawl: Fisheries department minister Lalthansanga chuan district tina sangha khawituten sangha an neih dan leh thar zat zirchiana sangha tam zawk leh lian zawk bakah sangha tharlâm zawk mipui eitir tuma ruahmanna siam a nih thu a sawi.
Ngaizel, Kulikawna SASCE hnuaia sangha vawn thatna tur, Cold Storage chu Thawhlehni khan fisheries department minister-in a hawng a, sangha chu vawn that a nih loh chuan hralh tlak loha chhe mai thin a nih avangin cold storage chu sangha khawitu leh zuartute tana hmasawnna pawimawh tak leh tangkai tak a nih tur thu a sawi a. District tina sangha khawituten sangha an neih dan leh an thar zat zirchiana, sangha tam zawk leh lian zawk an thar theih nan department-in ruahmanna a siam thu leh Mizorama thar sangha tharlam zawk mipui eitir an tum thu a sawi.
Cold Storage hawnna inkhawm hi Aizawl South II bialtu MLA Lalchhuanthanga’n khualzahawm niin a hmanpui a, thu a sawi bawk.
Cold Storage hi Special Assistance to States for Capital Expenditure (SASCE) 2020-2021 chhunga Integrated Fishery and Agro-based Processing Unit component, Horticulture Department Nodal-na hnuaia din niin, he project atan hian Rs. nuai 123 hmuh a ni a. He Cold storage-ah hian cold chamber pahnih awmin, sangha ton 16 vel vawng tha thei tura ruahman a ni.