Aizawl: Mizoram tlawha zin Union Minister of State, Agriculture & Farmers’ Welfare Ram Nath Thakur leh Agriculture Minister PC Vanlalruata te chu Thawhtanni zan khan State Guest House, Aizawl-ah an inkawm a. Ram Nath Thakur chuan Mizorama hmun thenkhat a tlawhnaa kuthnathawktute tihhmasawnna tura a ngaih pawimawhte sawiin, Agriculture & Farmers’ Welfare Department hnuaia sorkar laipui scheme hrang hrang chak zawka kalpui a pawimawh thu a sawi.
Ram Nath Thakur chuan Siaha district-a kuthnathawktute a tlawhnaah, mi taima leh thawkrim tak takte a hmuh rualin hmasawnna nasa zawk an chan theihna turin an harsatnate sukiang turin sorkarin mawhphurhna pawimawh tak a neih thu a sawi a. Sorkar laipui kaltlanga Agriculture department hnuaia kuthnathawktute tana tanpuina awm ang angte chu a dawngtu turten a hun taka an dawn theih nan thawktute chu tan la lehzual turin a chah a. Mizoram chu leilung hausakna ngah tak state a nih avangin hmasawnna chak zawk a awm theih nan heng leilung hausakna te hi hman thiam a pawimawh thu a sawi bawk.
Agriculture Minister PC Vanlalruata chuan kuthnathawktute dinhmun chawikan nana sorkar laipui atanga ruahmanna tha tak tak siam a ni thin chu lawmawm a tih thu a sawi a. Union MoS hnenah Tung leh Cocoa cultivation kalpuina turin sorkar laipuiah ruahmanna thehluh a nih tawh thu leh he ruahmanna hi kalpui vat a nih theih nan theihtawp chhuahpui turin a ngen.