AZL: Education Minister Dr. Vanlalthlana’n DIET Champhai Hostel Building chu nimin khan a hawng.
DIET Champhai, Auditorium-a hawnna inkhawmah Minister Dr Vanlalthlana chuan, hostel building thar hawn tak chu zirlai hmun hla zawka awmten an hman tangkai ngei a beisei thu leh, inngeih tlan zawk leh inpawh tlan zawk nan an hman ngei a beisei thu a sawi a. DIET hmanga zirna an tidanglam hi Mizoramin a hmuh hmaih loh tih a sawi bawk.
Minister chuan zirtirtu leh zirlaite zirtirna tidanglamtu leh tihmasawntu an nih theih nan theihtawp chhuah turin a chah a, an pawimawhna phochhuak turin tan la zel turin a fuih. Sorkarin a tul ang angah puih a tum zel thu leh, tha taka an thawh dun theih chuan zirna in ropui tak a ni reng dawn tih a sawi.
DIET Champhai Hostel Building hi May 9, 2022 khan hna tan niin, March 6, 2024 khan zawh a ni a, sak nan a vaiin Rs 2,18,65,593 sen a ni.
Nilaini vek khan Education Minister Dr. Vanlalthlana’n Govt. Champhai High School Golden Jubilee (kum 50 tlin) lawmna chu khuallian niin a hmanpui bawk.