Aizawl: Ram chhung hmun dangte rualin India-in a puala danpui duan hman theih tura a pawmna ni, ‘Constitution Day – Samvidhan Diwas’ chu Gauhati High Court, Aizawl Bench-ah Nilaini khan Larsap General (Dr) Vijay Kumar Singh hova hman a ni.
Larsap chuan November 29 chu India danpui hman theih tura pawmna ni a nih mai piah lamah a hlutna, hmathlir tha tak leh tun hun thlenga a la pawimawhzia lantirna hun a nih thu a sawi a. Ram danpui kaihhruaina hnuaia tun hun thleng thei tura India zinkawng ropui a tih thu sawiin, Gauhati High Court Aizawl Bench chuan Mizoram mipuite dikna leh chanvo humhim turin danpui hnuaiah mawhphurhna pawimawh tak a neih thu a sawi.
Larsap chuan Danpui chu mipui thlan rorelna inghahna bulpui a nih thu leh court rorelna chu danpui humhimtu a nih thu sawiin, Mizorama khawtlang inlungrualna, inrintawkna leh thlamuang taka chenhona chu India danpui thiltum, a taka lantirna pawimawh tak a nih thu a sawi a. Mizo khawtlanga remna, inzahtawnna leh tanrualna chuan Preamble-a inunauna zehtel ataka a lantir thu a sawi a. Danpui chu a chhawrtu tur mipuite an hriatthiam chauha thil ti thei a nih thu a sawi bawk.
India danpui chuan dikna leh chanvo a pek rualin an tih ve tur mawhphurhna fundamental duties a pek tel thu sawiin larsap chuan, a pahniha an kalkawptir thiam a tul a, ram chakna hnar chu dan neih tam lamah ni lovin, a kenkawh kawnga mipuite inpeknaah a innghat zawk tih sawiin, dan lam khawihtu kalkhawmte chu a ranglama dikna hlen chhuah a nih theih nante, ram zalenna tibuai lova mi mal zalenna vawnghim turte, danpui hlutna thalaite zirtira, intluktlanna kenkawh bakah remna leh inunauna vawnhim kawnga theihtawp chhuah turin a chah a ni.
Gauhati High Court judge pahnih, Justice Marli Vankung leh Justice Kaushik Goswami te pawhin thu an sawi a. Kalkhawmten Preamble an chhiar rual a ni.