Aizawl: Ni zung chakna hmanga Naoatla-I leh Naoatla-II khua chawmtu tur tui lakna (pump) khawl chu nimin khan PHED Minister Prof Lalnilawma’n a hawng.
Kum 2006 atang khan Naoatla-I leh Naoatla-II khua chawmtu tur tui hi vawmtlunglui hnar chu gravity hmanga lak a ni a. Vawmtlunglui hi lui mawngah nizung chakna hmanga pump tura ruahman a ni. Hemi atan hian NABARD loan Rs 4,16,84,000 leh State matching share Rs 46,32,000, a vaiin Rs 4,63,16,000 sen a ni.
Tourist Lodge, Naoatla-a hawnna inkhawmah PHED Minister Prof. Lalnilawma chuan tui in tur thianghlim pek kawngah PHED in theihtawp an chhuah zel dawn a, mipuite mamawhna chu tha taka hlen zel tum tih a sawi a. Tui pek chungchangah khawl chhiat vang te, pipe chhiat vang leh thil dang avangin tui pek theih loh chang a awm thin a, hemi kawngah hian mipuite nen inhriatthiam tlan a pawimawh hle tih a sawi.
Minister chuan tui pump khawl tha tak awm mah se, tui hna a awm lo ang tih a hlauhawm hle tih tarlangin, tui hna humhalh kawngah theihtawp chhuah turin kalkhawmte a chah.
Hawnna inkhawmah Siaha bialtu MLA Dr. K. Beichhua chu khualzahawm niin, thu a sawi bawk.