Aizawl: Lai Autonomous District Council (LADC) inthlanpui neih tur atana Sangau khua leh a chhehvela campaign-a Nilainia party mite nena an inkawmnaah Home Minister K Sapdanga’n state sorkar nena thawk dun a, hma la dun thei tur mipuiin an thlan chhuah a pawimawh dawn tih a sawi.
K Sapdanga chuan LADC-ah sorkar nghelnghet ding thei lovin Lai mipui hrehawm tih khawpin an aiawha an thlan chhuahte sorkarna fawng chelh tumin an thle tawn thin a, hetianga an hruaitute an awm fo chuan hmasawnna hnathawh tur hmachhawp hrang hrangte pawhin a tawrh phah fo thin a, chung chu mipuiin an tuar ta thin thu a sawi.
State-ah sorkar nghelnghet tak ZPM party-in a siam mek a, LADC-ah pawh sorkar nghet tak siam turin an inzuar mek tih sawiin K Sapdanga chuan, “District council chakna ringawt chuan hnathawh a theih lohzia hrechiangtu in ni a, state sorkar thlawh khumin hma a lak tak tak theih loh a, state sorkar nena thawk dun tur, hma la dun thei tur mipuiten kan thlan chhuah a pawimawh dawn a ni,” a ti.
“ZPM sorkarin an flagship programme thlai thar lei chu an sorkar kum khatna atangin an kalpui a, inthlan dawn hnaiha kalpui chauh thin party dangte chuan â min ti ngei ang, kuthnathawktute hamthatna tur a nih phawt kan hotupa, Pu Lalduhoma ho hian kan lo â ngam zel ang e,” a ti bawk.
K Sapdanga chuan, tuna opposition party-te hna pui ber chu ni tin ZPM sawichhiatna pakhat tal au chhuahpui a ni a, he ram tana aupui thar tur engmah an nei lo tih hre tura chahin, inhnialnaa chak zawk avanga an hmin theih mihring hi an vang hle a, dawhthei taka ngaithlatu leh nghaktu ten mi dang an hip zawk fo thin tih sawiin, Lai ram mipuiten ZPM party candidate-te vote-pui vek turin a ngen a ni.