Aizawl: MNF Sr Vice President Dr R Lalthangliana chuan tun anga state sorkarin district council-a thawktute ngaihthah lutuk a awm ngai a hriat loh thu a sawi.
LADC inthlanpui neih tura campaign-a Lawngtlai chhunga veng hrang hranga campaign office-a Nilainia thu a sawinaah Dampa bialtu MLA chuan minister anga district council affairs a lo enkawl tawhah thawktute hlawh an batsak reng ngai loh thu a sawi a. Kum 40 chhung politics-a a awm ve tawh hnuah tun anga thla eng emaw zat state sorkarin hlawh an pek theih loh a awm ngai loh thu a sawi.
Eng emaw harsatna awm ve zeuh thin mah se, tun anga state sorkarin district council-a thawktute ngaihthah lutuk a hriat ngai loh thu sawiin, “Kan sorkar hunah chuan innamnul lutuk hi kan ti ve ngai lo ang, a siam that hna kan thawk zel zawk tur a ni. ‘Pathian leh kan ram tan’ titu kan nih angin keini chuan harsatna a lo awm ve anih pawhin dawhkan khatah council hruaitute nen kan sawi dun thin ang,” a ti.
Dr R Lalthangliana chuan ZPM sorkar a sawisel hrim hrim ni lovin an thil tih dik loh a sawi mai zawk a. Chutih laiin, district council sorkar hi Sixth Schedule-ah mumal taka dinhmun siamsak an ni a, an zahawmnate pawh humhim sak an ngai hle a, state sorkar hian a tawngpawng pal bawrh bawrh a thiang lo, development hrang hrangah a ni emaw, district council-a sorkar hna thawk nghet leh nghet lote pawh state sorkar hian a ngaihthah tur a ni lo tih a sawi.