Kar thar maiah Lai Autonomous District Council (LADC) inthlan a ni dawn a, political party hrang hrangin thapui thawhin, ram an lak tumna boruak a lian chho sawt hle.
Inthlan dawn apiang hian kan ADC pathumte hian campaign an bei ngawrh thei viau mai a, party tin pawh anmahni theihna zawn theuhah an tang mar thei hle.
Hetih lai hian kan ADC te hian rorel hleih theih loh chang an ngah fo ta mai hi enfiah a tul ta viau. Party aiawha thlan tlinte hian an tlin tak hnua an thutna sawn an hreh lo fo reng mai hi ngaihtuahzui a ngai a, state a rorel lai apiangin an kaihbu atana an hmang zui thei ang maia an awm fo pawh hi a fuh ber tawh lo.
Aiawh thlanchhuahte hian an mipuite rawngbawlsak turin theihtawp chhuah zui mai se la, sorkar-a tel ve a, mahni thutthleng thawhsan fo duhkhawpa nihna duh leh rorel duh hruaitu hi ni lo ngam fo teh se.
Ral atanga thlir mai pawhin term khat chhunga ADC te inthlak kual ngun lutukte hi vei ila, political party te pawhin an mi leh sa hup bet chungin rorelna kawng dik zawh turin hrilh ngun zawk teh se. Chuti a nih loh chuan ADC inthlan apiang hian party atanga thlantlinte hian an awmna an sawn thei reng tih hi a tur rengah ngaih a ni palh ang tih a hlauhawm.