Delhi Congress hruaitute chuan Nilaini khan hmai tuam chung leh oxygen bur nen thuthar lakhawmtute kawmin khawpuia boruak bawlhhlawhzia an pho chhuak a, rorel lai, BJP chu ‘health emergency’ an tawn mek atanga hruai chhuak vat turin an phut.
Ram kawpui bera boruak dinhmun hi Nilainiah pawh khan ‘chhe tak’ huangah la awmin AQI chu 335 a la ni a, ni 12 chhung a zawna he huanga an awmna a ni tawh.
Delhi Congress chief Devender Yadav-a chuan thuthar lakhawmtute an kawmnaah hian Delhi sorkar hnenah boruak bawlhhlawh nasa lutuk kaihhnawihah memorandum an thehlut dawn tih a sawi.
“In hmun ang hian kan hruaitute hi oxygen bur nen an lo thu a. Hei hi entirna a ni a, a tak taka Delhi dinhmun chu tute tan pawh dam khawchhuah khirhna a ni a, oxygen bur hi kan la keng zel dawn,” a ti.
Delhi-a in sakna khu chungchang sawiin Yadav-a chuan, “GRAP III hman a ni a, in sak kaihhnawih khap mek a ni a. Lehlamah boruak bawlhhlawh zel tur venga beih a nih laiin lehlam atangin ni tin inhlawhnaa sum thawh chhuah a awm loh avangin nawrna a awm bawk,” a ti a. Damdawi inte pawh thawk lama harsatna neite avangin a khat hlawm niin a sawi.
Yadav-a hian Chief Minister Rekha Gupta-i’n khawpuia boruak bawlhhlawh lutuk tihziaawm a tiam tih a sawi a. Chief minister hlui, Sheila Dikshit-i hlawhtlin tawhna sawiin ani hun lai khan khuarel thila harsatna hrang hrang chu an thunun thei thin niin a sawi.
“Bus-te pawh diesel hmang atangin CNG hmangah kan thlak a. Metro Phase I leh Phase II pawh hun tiam hmain zawh fel a ni bawk a. Hengte hi Congress sorkar tih a ni a, hengte hian kan beihzia a pho lang a ni,” a ti.
Yadav-a hian sorkar kal liam chiah, AAP sorkar pawh demin an hun lai khan vantlang inkalpawhna hmanrua pawh an thuam chak miah lo niin a sawi.
An hruaitu dangte pawhin tuna an dinhmun mek chu ‘health emergency’ a nih thu an sawi hlawm.