Ryan Williams chuan tun hnaiah Australia ram aiawha khel loa India ram aiawha khelh a thlang a, a duh thlanna hi FIFA pawhin a pawmsak tawh.
Perth, Australia-ah Williams hi a piang a, an chhungkua hi thisen inpawlh neuh neuh an ni a tih theih a. A nu, Audrey chu Mumbai khawpuia Anglo-Indian chhungkua atanga chawr chhuak a nih laiin, a pa, Kent chu England atanga chawr chhuak a ni thung.
A pu, a nu pa, Lincoln ‘Linky’ Grostate chu kum 1950 bawr vela Santosh Trophy-ah khan Bombay aiawh pawhin a lo tel tawh a ni.
Indian Super League (ISL) team Bengaluru FC winger Williams hian Australian passport a neih chu titawpin India khua leh tui nih a thlang a. Australia, England, Wales leh India tana khel thei niin India tana khelh hi a thlang ta ber a. A duhthlanna hi All India Football Federation (AIFF) chuan an pawmsak a, FIFA hnenah an thlen a, anni pawh hian an lo pawmsak ve ta a ni.
AIFF chuan thuchhuah an siam a, “FIFA hnuaia Players’ Status Chamber chuan Ryan Williams chu India aiawha khel turin an pawm a. November 19, 2025 khan an thutlukna hi an puangzar a, heti a nih takah chuan Ryan Williams hi India ram aiawhin a inkhel thei tawh dawn a ni,” an ti.
An thuchhuahah chuan FIFA-in he mi chungchang an ngaihtuah chhung zawng khan AIFF chuan tha takin an thlawp tlat tih an puang.
Williams hi Australia U-20 leh U-23-ah a tel thin a, senior team-ah pawh a khel ve hman a, kum 2019 khan substitute niin second half-ah South Korea lakah an luhtir ve a ni.
July, 2010 khan Portsmouth academy chuan scholarship an ziahpui a, January 31, 2011-ah Fulham a zawm a. Loan-in Gillingham, Oxford United leh Barnsley te a zawm hnuah Barnsley hi a nghetin a zawm zui a. Rotherdam United, Portsmouth, Oxford United leh Perth Glory-ah te a khel kual leh hnuah July 28, 2023 khan Bengaluru FC a zawm a ni.
Dhaka khawpuia India-in Bangladesh an hneh loh pawh khan Williams hi an hruai tel a, FIFA-in India tana khelh phalna an la pek loh avangin a tel ve ta lo thung a. Tun atang chuan a tel thei dawn tawh a ni.
Japan-a piang, Izumi Arata chuan kum 13 kal taah khan India tana khelh a lo thlang tawh bawk a. kum 2013 leh 2014 khan India tan vawi kua chu a khel hman a ni.