Aizawl: Art & Culture Minister Pu C. Lalsawivunga’n Aizawl Pisapui kang chu Indian National Trust for Art and Cultural Heritage (INTACH) duh ang chiaha sak that hna thawh mek a nih thu a sawi.
Ningani khan Art & Culture C Lalsawivunga’n Lunglei Convention Centre-ah INTACH Lunglei Chapter a hawng a. Hawnna inkhawmah C. Lalsawivunga chuan pi leh pute sulhnu leh chin dan thate chawi nung leh vawng him zel tura INTACH Lunglei Chapter hawn theih a ni ta chu lawmawm a tih thu sawiin, chumi atana tha leh zung thawhtu mi thahnemngai tak tak an awm chu ropui a tih thu leh a ngaih hlut thu a sawi.
Minister chuan kum 1987-a din INTACH Mizoram Chapter zarah dan tha tak The Mizoram Ancient Monuments and Archaeological Sites & Remains Act 2001 neih phah a nih thu leh he dan tlawh chhan hian pi pu hmun hlui 81 lai chu State Protected Monument-ah puan a nih tawh thu te a sawi.
C Lalsawivunga chuan Lunglei district lamah pawh Zosapte leh Sapho sulhnu te, pi pute sulhnu hlu tak takte chu humhalh zinga a tel thu a sawi a. INTACH hmalaknain Mizoram State Protected Monument pathum – Kawtchhuah Ropui (Vangchhia), Ralven Puk (Vangchhia) leh Lungphun Ropui (Lianpui) te chu National Importance-ah puan a nih tawh thu leh sorkar laipui Ministry of Culture hnuaia Archaeological Survey of India atangin a chei that nan tanpuina thahnem tak dawn a nih tawh thu te sawiin, INTACH chu ram rohlu leh pawimawhte humhalhtu ber a nih avangin Mizoram sorkar pawhin ngai hluin, a dah pawimawh thu te, Aizawl Pisapui kang pawh INTACH duh ang chiaha sak that hna thawh mek a nih thu te a sawi.
INTACH hi kum 1984 khan din niin, Delhi-ah hmunpui an neih bakah, India ram hmun hrang hrangah chapter 200 chuang an awm mek a. Tuna Chapter hawn thar Lunglei Chapter-ah hian member 40 awm mek a ni.