Aizawl: Mizoram sorkarin ruihhlo do beihpui (Operation Jericho) a thlak hnuah Saiha district chu Myanmar ramria awm ni mah se, ruihhlo lut a tlem thu sawi a ni.
Ningania Siaha DC Conference Hall-a Home Minister K Sapdanga hova sorkarin ruihhlo do beihpui a thlak mek chungchanga hmalak zel dan tur sawihonaah, Siaha District SP Manny Bushan Singh chuan, Siaha district chu Myanmar ramria awm ni mah se, ruihhlo lut a tlem thu a sawi a. Myanmar lamah pawl thenkhatin drug tawlhruk an khuahkhirh that em avangin Mizoram chhung atanga ruihhlo lut tur an ven uar zawk thu leh, Siaha district chin hmun thum – Tlangpui, Tuipui Ferry leh Kawlchaw ah te Check Gate an siam thu a sawi.
Operation Jericho neih a nih hnuah Siaha district chhungah heroin gram 30.92 man a ni tawh a, hemi kaihnawihah hian mihring pahnih man an ni tawh bawk. Cough Syrup bur ruk man niin, MLP Act hnuaiah zu litre 48.5 man tawh a ni a, zu chhuan tur tin 280 leh bel 11 bakah beer cane 18 man a ni tawh a. MLP Act hnuaiah hian thubuai 21 ziah luh tawh bawk.
Home Minister K Sapdanga pawhin thu sawiin, Siaha district-in ruihhlo dona lamah theihtawp an chhuah avangin Mizoram Police, Excise & Narcotic, tlawmngai pawlte hmalakna fakin, Siaha DC hmalakna chhuanawm a tih thu a sawi bawk.
K Sapdanga chuan, Siaha khawpui chhungah thalai 30 leh 40 inkar ruihhlo ngawlvei an awm mek thu sawiin, district dang aia ruihhlo bawiha tang an tlem nia a hriat thu a sawi a. Ruihhlo hman sualin a ken tel HIV chungchangah pawh hma an la tha hle nia a hriat thu sawiin, Siaha district chu Drug Free District ni tura tan la leh zual turin a chah bawk