Chawlhkar khat liam taa boarding sikul atanga Nigerian hmeichhe naupang ruk bo 24-te chu chhuah an ni tih an ram president-in a sawi.
Kar hmasa Thawhtanni khan ralthuam nen mi sualten Kebbi State-a sikul hi luhchilhin thawktu pahnih leh zirlai 25 an hruai a, a hnuah pakhat a tlanchhuak.
Nigerian President Bola Tinubu-a chuan venhim hna thawktuten an bawhzui dan fakin zirlai zalen tate dinhmun tak erawh a sawi lo.
Africa khawmualpuia mihring tamna ber ramah hian kar liam ta khan inruk bona lian tak tak thlengin Zirtawpni khan Catholic sikula zirlai 250 chuang ruk bo an ni bawk a, an chin an la hre lo.
Zirtawpnia inrukna hi Niger State-a thleng niin Nigeria chanchina inruk bona lian ber nia sawi a ni a. Hetih lai hian thuneitu thenkhat chuan a zat hi heti em em a ni lo niin an sawi.
Nigeria-ah hian kum 2014-a Chibok-a zirlai 276 ruk bo an nih atangin sikul atangin mi 1,500 chuang ruk bo an ni tawh a. Mi sual rual, bandit an tih maiten a huhova mi an ruk hian tlanna sum an phut vang a ni thin.
Zirtawpnia Niger state-a Catholic boarding sikul, St Mary’s atangin zirlai leh thawktu mi 300 vel ruk bo niin Christian Association of Nigeria (Can) chuan a sawi a, heng zinga 250 vel hi an chin an la hre lo niin an sawi.
Nilaini khan Niger state Governor Umar Bago-a chuan St Mary’s zirlai 11 chu lovah hmuh niin chhanchhuah an ni tih a sawi a, a bak a sawi zui lo.
Bago-a hian Can-in mi 300 an tih chu a chiang lo niin a sawi a. Police commissioner pawhin a dik a rin loh thu a sawi.
Hetih lai hian Niger-a Can hotu, St Mary’s enkawltu ni bawk, Bishop Bulus Dauwa Yohanna chuan sorkarin hma a lak dan demin ‘bote chhanchhuah tumin awmze neiin hma an la lo’ niin a sawi.
Sikul pahnih bakah hian kar hmasa khan chhim lama Kwara state-ah inkhawm lai ruk bo an ni a, chhuah leh an ni tawh thung.