Dt. 16th November, 2025 khan Mizoram mi pawimawh ber zinga mi Pu TBC Lalvenchhunga, MLA, Adviser to chief minister, finance chuan chief minister hnenah a banna a theh lut a. He thil hian sawi zui a hlawh hle. Dt 18th November-ah chief minister chuan TBC Lalvenchhunga banna thehluh hi a pawm loh thu chanchinbu mite hmaah a sawichhuak a. Mahse vawiin thlengin TBC Lalvenchhunga hian office a la zawm lo nia sawi a ni.
Pu TBC Lalvenchhunga hi MLA satliah mai a ni lova, Mizoram sawrkar sum leh pai virvel zawng zawng chief minister aiawha enkawltu a ni. Kan ram pawhin a hnathawh hi kan tangkaipui hle tih chu vantlang hriat a ni. Finance minister ni mek chief minister hi chu hnadang a tam nen, a buai em em a, finance hi fimkhur ngai leh mi bik tan lo chuan enkawl rual a ni lo a ni.
Hetiang hi a dinhmun a lo nih avang hian a bang hi tawngpawng ngawih ral pui mai chi a ni lova, finance lamah kan sawrkar hi a ruak ru hle dawn a, chu chuan kan ram hmasawnna a khawih buai thei hle. A aiawh emaw an dah a nih loh chuan kan sawrkarah hmun ruak zau tak a awm dawn avangin sawrkar hmalakna a khingbai hle ang.
Tin, kan chief minister hian he hna pawimawh chelh tur hian tha ber nia a hriat a ruat a, chu chu a hnuaia MLA chuan a kawi a ngilin a zawm mai tur a ni a, a zawm duh lo a nih chuan a ruattu hi a zah lo a ni a, a chungah pawh action a la tur a ni. Chumi piah lamah chuan ZPM party hian chief minister thu zawm duh lo MLA chungah hian action la in, MLA atanga bang turin an nawr tur a ni ang. An party sawrkar chhunga in lungrual taka hma an lak theih lohna chhan hi an chhuifiah ang a, engemaw action an lak a ngai bawk. Heng thil hi an ti ngam lo a nih chuan MLA dang pawhin an duh hun hunah sawrkar an phatsan thu an la puang pawp pawp hlawm ngei bawk ang. Sawrkar chhunga lungrualna a awm tawh loh chuan mipui hi a tuartu kan ni zel bawk dawn a, chutiang dinhmuna kan sawrkar a awm chu an phal tur a ni lo bawk.
Sawrkar miliante hi kan aiawha kan thlan tlinte an ni a, ram rawngbawl tur an nih avangin an rawngbawl sak mipuite hian an dinhmun kan hriat hi kan right a ni a. TBC Lalvenchhunga dinhmun pawh hi kan sawrkar hian mipui hriatah a puang chiang vat tur a ni. Chu chu democracy inkaihhruaina dik a ni si a.