AZL: Save Tuitun Committee-in Kawnpui leh a chhehvel khaw chawmtu Tuitun lui chu 4-lane kawngpui laih mekin a khawih theih dan Inrinni khan an enfiah a. Hnathawktuten kawngpui laihna leivung chu Tuitun luia luang lut lo tura an siam thei dawn lo a nih chuan hna thawk chhunzawm tawh lo mai se an ti.
Save Tuitun Committee-in 4-Lane kawngpui laih mekah Tuitun lui tibawlhhlawh thei leivung paih a awm nual avangin uluk zawka vilzui ni se, an ti a; kawngpui laihin mipui hnena tui thianghlim sem turah harsatna a thlen lohna tura PHE Dept.-in NHIDCL a proposal an theh luh chu a rang lama approval hmuh a nih theih nan an hnathawh titawp rih mai turin Kolasib DC hnenah a rang lama thlen nise an ti bawk.
Save Tuitun Committee-ah hian Kawnpui, Bualpui, Khamrang, Mualkhang leh Zanlawn-a VC, YMA leh sorkar department aiawh te an tel a. 4-Lane kawngpui laih vang hian Kawnpui leh a chhehvel khaw chawmtu tui lakna pakhat chu tihchhiat a lo ni tawh a, hei vang hian hnathawhna hmun thenkhat chu chhunzawm rih lo tura hriattir an lo ni tawh a ni.