Aizawl: Champhai District NGO Co-Ordination Committee in Mizoram State University Eastern Campus, Champhaia din turin chief minister an ngen.
Committee hian Mizoram State University Eastern Campus, Champhaia din tura ngenna lehkha hi Ningani khan an thawn a. Sorkar laipuiin National Education Policy 2020 a ruahman angin affiliating university titawpin university hrang din tura a tih angin Mizoram sorkar pawhin state university a din chu lawmawm an tih thu leh, puitling thuai thei se an duh thu an sawi a. Champhai chu Mizoram khuaah a lian ber pathumna ni mekin an thang chak hle a. Khawchhak lam nen insumdawn tawnna hmunpui niin border trade-ah pawh sorkar laipui thlenga a ngaih pawimawh khua a nih thu sawiin Govt Champhai College pawh Mizoram college hlun leh upa pawl, upa ber dawttu niin kum 1971-a din a nih bakah khawchhak lamah chuan college changtlung leh campus nei tha ber tia chhal theih hial a nih hial thu an sawi.
State University din a nih dawn takah chuan Govt Champhai College chu tichangtlungin Eastern Campus dinna remchang tak a nih thu leh chumi atana an mamawhte an tar lang a ni.
Champhai District NGO Co-Ordination Committee chuan Mizoram sorkarin Aizawl mai ni lo, district dangah Mizoram State University din an rawt takah pawh Champhai pawh din awmna ber pawl an nih thu an sawi a. Champhaiah Mizorama thil pawimawh dah a nih ve loh avangin hmasawnnate chu khawchhak lamah thleng ve se an duh thu sawiin Mizoram State University Eastern Campus Champhaia dahsak ve ngei turin an ngen a ni.