Mizoram Motorsports Association (MiMSA) chuan LBS Suzuki thawhpuiin championship an neih tawha ropui ber ni thei turin inbuatsaihna an kalpui mek a, December 3-6 chhungin Tuirial Airfield-ah ennawn leh hun hlimawm tak nen 2025 season an khar dawn.
Mizoram State Sports Council kum 50 tlin lawmna a ni nghal dawn bawk a; two-wheeler chi hrang hrang kawng ngila intlansiak (drag race) leh tlankawnga intlansiak (circuit race) bakah kawng chhiaa intlansiak (motocross) a awm dawn a, kawng ngila car intlansiak a awm tel bawk ang.
Championship sponsor LBS Suzuki hnen atanga lirthei leitute tan tlankawnga Suzuki One Make Race (250cc stock class) a awm ang a, Suzuki V-Strom (250cc) bik tan kawng chhiaa intlansiak bakah Suzuki scooter neitute inelna bik siamsak an tum bawk.
Man chawi lovin a duh apiang tan a hmunah en theih a ni a, MiMSA hruaitute chuan championship an buatsaih vawi 32-na tur a ni a, tum dang aia ropui leh hmuhnawm a ni dawn tih sawiin en manhla tak a nih dawn avangin a hmuna kal vek turin mipui an sawm a ni.
A khar zan ni, inrinniah tunlai zai thiam tak takte inlanin ropui takin concert buatsaih tel a nih dawn a, tunhnaia neih zawh tak LBS Durian Furniture Comedian Search-a pakhatna Lalhriatpuia (Luangmual, Aizawl) chuan mipui a tihlim bawk ang.
A hmun chungchangah harsatna a awm avangin kuminah season khar thei lo turin MiMSA chuan ruahmanna a siam hman a. Mahse, an duh ang hun December tirah championship hmawrbawk a nih leh theih dawn avangin lawmawm an ti hle a, rider, driver leh team-te pawh phur takin an inpuahchah a, 2025 chhunga inelna hrang hranga season champion chin fel nghal a ni dawn a ni.