Aizawl: Mizo Academy of Letters (MAL) chuan thu leh hla lama thawhhlawkte hnena kum thum dana chawimawina sang an pek thin, ‘Academy Award’ chu Revd Dr. Chuauthuama (L) hnenah Inrinni khan an hlan.
MAL chuan Mizoram Legislative Assembly Annexe Building-ah ‘Kum Tawp Inkhawmpui’ an hmang a. He inkhawma khual lian Lalbiakzama, Mizoram Legislative Assembly Speaker chuan Revd Dr. Chuauthuama hnenah Academy Award hi a hlan a. Revd Dr. Chauthuama aiawhin a nupui Lalchhumi hnenah chawimawina hi a hlan a ni.
MAL inkhawmpui chawhma inkhawm hi Vice President, Prof. Rualkhuma Colney chuan a kaihruai a. Khual lian Lalbiakzama chuan, Mizo thu leh hla hmasawnna atana MAL hnathawh chu ropui a tih thu te, kum tina lehkhabu chhuak tha ber ‘Book of the Year’ leh thu leh hla lama thawhhlawkte hnena ‘Academy Award’ an hlan thinte chu ropui a tih thu a sawi.
Assembly Speaker chuan MAL Thu leh Hla Chanchinbu kum 60-na special issue te, Dr. Darchuailova Renthlei lehkhabu, ‘Tlang Thawveng 2’ leh Lalsangpuii lehkhabu ‘Lawhlei’ tih chu a tlangzarh bawk.
Academy Award dawngtu Revd Dr. Chuauthuama fanu, Dr. Elsa Lalramzauvi pawhin thu sawiin, ‘Academy Award’ a pain a dawng chu ropui a tih thu leh a pa khan hre ve se a thil ngaihhlut ber zinga mi a nih a rin thu sawiin, “Ka pa thu min chah thin dikna hi ram leh khawtlangah i chawi sang zel ang u,” a ti.
Academy Award hi kum 1097 atang khan hlan tan a ni a. Boral hnu (posthumous) hian mi pathum – KC Lalvunga (Zikpuii Pa), Rev. Dr. Zairema leh L. Keivom te hnenah hlan a lo ni tawh a. Revd Dr. Chuauthuama hi a boral hnua he chawimawina dawng thei palina a ni.
Chawhnu rorel inkhawm chu an pawl President Prof. R.L. Thanmawia’n a kaihruai a, report hrang hrang ngaihthlak a nih bakah MAL chhunga hman tur bik Mizo thumal hrang hrang chhawpchhuahte chu inkhawmpui hian a pawm a. An pawl hming, Mizo Academy of Letters tih pawh ‘Mizo Thu leh Hla Inpui’ (Mizo Academy of Letters) tia vuah tura rel chu an pawm bawk.
Mizoram Journalists’ Association (MJA) Gen. Hqrs. kaihhruaina hnuaiah kum 2025-2027 chhunga MAL hruaitu tur an thlang nghal a. President-ah Prof. R. L Thanmawia, Vice President-ah Prof. Rualkhuma Colney, General Secretary-ah Dr. Zoramdinthara, Asst. General Secretary-ah Dr. H. Laldinmawia, Treasurer-ah Dr. Dorothy Zonunsangi leh Finance Secretary-ah Lalsangpuii te an thlang bawk.