Sri Lanka-a tui lian leh lei tawlh nasa avanga thi chu mi 193 an tling tawh a, mi 200 chuang chin hriat lohva la awm mekin kum tam tak hnua khaw awm dan uchuak avanga chhiatna an tawh lian ber an tawng mek.
Chenna in 20,000 chuang a chhia a, Disaster Management Centre chuan sorkarin khawsakna tur a siamsakah mi 1,08,000 chuang an awm mek tih a sawi.
Cyclone Ditwah a thawh hnuah thuneitute chuan an ram hmun thuma thena hmun khat chuang mahin electric leh tui herh haw tur an nei lo nia sawiin emergency puan a ni tih an sawi.
Kelani River chim chin a la san mek zel avangin hmun thenkhatah chuan insaseng tura tihna thupek chhuah a ni bawk.
Thihna thlenna tamna ber chu Kandy leh Badulla-ah niin hmun tam tak tlawhpawh theih lohvin a la awm.
“Kan khuaa mi pahnih kan chân a mi dangte chu temple-ah leh chenna in la dingah te an awm khawm a ni,” tiin Maspanna-a Badulla khuaa mi, Saman Kumara chuan a sawi.
“Tumahin khua kan chhuahsan thei lo va, lei min avangin tute mah an lo lut thei lo bawk a. Ei tur a awm lo va, tui thianghlim in tur pawh a awm lo,” tiin News Center website hnenah telephone-in a hrilh.
Police chuan thi zingah hian Inrinni chawhnua hmar lam laili district, Kurunegala-a upate enkawlna tuiin a chimah tar 11 an tel tih an sawi.
Anuradhapura-ah tui lianin a chim bus atangin mi 66 chhanchhuah an ni bawk.
Sorkar chuan ram dangte chu pui turin an ngen tawh a, ram pawna Sri Lankan awmte pawh harsatna tawkte chhawmdawlna tur pawisa thawh khawm turin an ngen bawk.
Cyclone Ditwah hian Zirtawpni khan thliarkar ram khawchhak vaukam a hrut a, tunah erawh chuan a kalsan leh tawh.
Sri Lanka-ah hian fur lai a ni mek a; mahse, tun anga khaw awm dan uchuak tak avanga chhiatna thleng ang hi an tawng tam lo hle.
Tun kum zabia Sri Lanka-in tui lian a tawrh nat ber chu June, 2003 kha niin mi 254 an thi a, mi sang tel baihvaiin an awm phah.
Asia chhimchhak hmun dangah pawh kum tam tak hnua tui a len nasa ber tum an tawng mek hlawm a. Indonesia, Malaysia leh Thailand-ah mi maktaduai tel an buai mek.