Aizawl: Mizoram sorkar flagship programme ‘Bana Kaih’ scheme kalpui tawh zinga endik tawh chinah, zaa 90 chuan hna an thawk tha tawk nia ngaih a ni.
Nimina Mizoram State Policy Coordination Committee chu an chairman, Lalduhoma, Chief Minister hovin CM Conference Hall-ah an hmalakna thlir letin an thukhawm a. Bana Kaih scheme kalpui tawh zinga endik tawh chinah zaa 90 chuan hna an thawk tha tawk nia ngaih thu an sawi.
Thutkhawmah hian handholding hnuaiah thawhpui bank tam zawk an awm theih nan hmalak an rel a, a rang lama bawhzui tur an ti.
Cooperation department-in handholding hnuaia pawlin a dil theih loan dilna an thehluh project 18 an thlir a, a tul anga bawhzui turin an ti a. Animal Insurance Scheme (Livestock Insurance Scheme) hmalaknaah a thawh khat nan ran 3,300 vel huama kalpui phawt turin an rel a, tunah hian AH & Vety hnuaiah Progress Partner mi 1,010 an awm mek a, a tam zawk hian vawk vulh an thlang a ni.
Thawhpui bank-te atangin loan hi pek tawh 287, bawhzui mek 280 leh en that leh tura bank ten an thawn kir 113 an awm a. Handholding thawh hnihna atan loan component-a diltu hi mi 330 an awm leh mek a, nghak khawm lova endik nghal zel tur an nih avangin line department-te che rang turin an chah.
A thawh hnihnaah vek hian CM Special Package diltute dilna 570 chu endik tura thlan an ni a, a diltu leh endik tura thlan zat hi ni tin a danglam ve reng a. Dilna hun hi a hrana hawn a ni tawh lo va, engtiklai pawha thehluh theih a ni.
Monitoring report hi AH & Vety, Horticulture, Fisheries, I&PR, LRS&WC leh Sericulture atangtein Monitoring report dawn tawh a ni a, an endik tawh china zaa 90 vel te chu thawk tha tawka ngaih an ni.