Bangladesh prime minister hlui, Khaleda Zia-i chu Dhaka khawpuia damdawi inah ‘dinhmun hniam takin’ a awm mek tih an party chuan an sawi a. A fapa, ram danga tlanchhiaa an party chief nihna chelh mektu, Tarique Rahman-a erawh a haw dawn em a hriat loh.
Kum 80 mi, Zia-i hi Bangladesh Nationalist Party hruaitu niin Pathianni hmasa khan mi mal damdawi inah a awma harsatna a neih avanga a lung leh chuap tha lo vangin dah luh a ni tih doctor leh an party hruaituten an sawi.
Nikuma zirlaite kaihhruaia Bangladesh-a prime minister nihna chelh rei ber, Sheikh Hasina-i paih thlak a nih hnuah an party hian tun hnaiah thawm an nei lian thar leh mek a ni.
Kum 2008 atanga London-a cheng, Rahman-a chuan Inrinni khan Facebook-ah Bangladesh-a a kir leh kir loh chu ‘amah thunun phak loh vek’ a nih thu a sawi a, hei hian politic leh dana inhrui pawhna a siam phah mek.
An rama sorkar lailawk ding mek hruaitu, Muhammad Yunus-a chuan a hnuah ‘a lo kir phal loh emaw, duh loh emaw’ a nei lo tih a sawi zui.
“Engmah hnialna a awm lo,” tiin Yunus-a press secretary Shafiqul Alam-a chuan Facebook-ah tho a tar lang a ni.
Sorkar lailawk hian Rahman-a Bangladesh-a haw a duh a nih chuan rang takin a haw theihna tur visa an ngaihtuah ang tih foreign minister nihna chelh mektu, Touhid Hossain-a chuan Pathianni khan a sawi bawk.
Rahman-a hi nikum August thlaa Hasina-i paih thlak a nih hnua a laka thubuai siam zawng zawngah thiam chantir vek a ni a, dan anga an rama a haw lehna tur dal theitu a awm tawh lo.
Kum 2014 leh 2024 inthlanpui boycott-tu, Bangladesh Nationalist Party hian nikum August atang khan boruak an nei lian thar leh mek a, an ram inthlanah pawh hnehna chan mai beiseiawm takin an ding mek.