A tir lamah chuan misual (villain) hoin intih pa nan leh in lak puithu nan an pak khu vut vut thin. A changtupa te’n an zu ngai meuh lo. 1990’s chho vel atang khan Bollywood huhang na tak chuan a changtute thlengin a nghawng buai viau mai a. Zial an lek lam chho a, a hmei a pa in an khu ta luih luih mai.
AAMIR KHAN: Kum 2010 daih tawh khan thutiam a neihah ‘Zial nghei’ a ti a, a hlawhtling. “Tu emaw tana i nghei chuan i hlawhtling dawn lova, nangma pual liau liaua i nghei a ngai,” tiin a sawi.
HRITHIK ROSHAN: Bollywood star zinga zial nghei hnai vai ber a ni awm e. “Guzaarish film-ah khan zuk a ngaih tlat avangin ka zu chho ta a, tunah erawh ka thlah fel thei a, ka veng huai mai. Zial min petu an awm hian ka hnar ngai lo. Ka la a, ka kutin ka nuai sawm nghal vek zel. Chu chuan chakna thar min pe thin a, kan thianpa Arjun Rampal pawh nghei turin ka fuih thlu thei a, ka lawm hle a ni,” a ti.
SANJAY DUTT: Nghei hmak harsa a ti deuh rih a, a zuk zat erawh a titlem tawh hle. “Fa pahnih ka neih hnuah nasa takin ka tihniam a, nikhatah tlawn 2 bak ka zu tawh lo,” a ti.
URMILA MANTONDKAR: Zial a nghei hnuin midangte pawh fihlim turin theih tawp a chhuah a. Fans te hian an mi ngaihsan te tihdan an zir thin tih hi a hmuhchian em avangin entawntlaka awm turin filmstar dangte pawh a ngen fo thin. “Zial tlawn khat hian mihring nunna minute 3 zelin a ti tawi. A hlauhawm viau lo maw? Hlauh nachang i hre lo fo a nih chuan i huaisen ni lovin, i mawl tihna a ni,” tiin Urmila hian huaisen takin a sawi.
AJAY DEVGAN: A fihlim lova, Golmaal 3 film siam laia puipunna hmuna zial a zuk avangin cheng 100 chawi tir a ni a, health department atangin fimkhur tura hriattirna a dawng bawk.
SALMAN KHAN: Chandigarh-a ‘London Dreams’ film an siam khan zial a zu a, pawisa chawitir a ni.
SHAH RUKH KHAN: King Khan hian Indian mipuite rilru hneh hle thin mah se, puipunna hmuna zial a zuk fo thin avang hian sorkar laipui meuh pawhin thawm a chhuah hial a, IPL inkhelhahte khan a khu luih luih thin a, hriselna lama hmalatute an lungawi lo hle.