Delhi-a Red Fort bula thihchilh bomb tihpuah chhuina kal zelah National Investigation Agency (NIA) chuan Jammu & Kashmir Police leh Central Reserve Police Force (CRPF) puihna nen Thawhtanni khan Kashmir-a hmun 10 an dap.
Zing hma taka bul tanin an mi rinhlelhte nena inzawmna nei nia an hruat hmunhma zawng zawng an dap a, Jaish-e-Mohhamed firfiak pawlte nena inzawm hai chhuah an tum a ni.
Thuneituten beihpui an thlaknaah hian district hrang hrang an tuam a, November 10-a bomb puaka mi 15 an thihnaah hian finfiahna an neih tawhte chiang lehzuala hriat tumin hma an la a ni.
Hmun an dapte hi Nadigam (Shopian), Koil (Pulwama), Chandgam, Malangpora leh Samboora-a mite an ni.
Thuneitute chuan agency hian digital device, lehkha pawimawh leh inbiakpawhna hnuhma ang chi an dap ber tih an sawi.
Chhuitute chuan Red Fort-a i20 car puak ta kha vehicle-borne improvised explosive device (VBIED) hmanga tih a ni tih an sawi a. Car kha Koil-a mi, Dr Umar Nabi-a khalh a ni a. A thawhpui pahnih, Dr Adil Rather, Qazigund leh Dr Muzammil Ganai, Koil te chu J&K Police leh Haryana Police ten Faridabad an lo man tawh bawk.
Chhui hna thawhnaah hian agency-te chuan a tirah Faridabad an chhui thleng a, hetah hian Kashmiri doctor pathum, Al-Falah University-a thawkten an buaipui a awm tih an hre chhuak a ni.
Tihpuahnaah khan puak thei kg 2,900 hman niin electronic detonation device leh IED remkhawm nana hman thil chi hrang hrang an hmang.
Lucknow-a doctor hmeichhia, rinhlelh zinga tel, Muzammil Ganai-a nena inneia university-a pharmacologist ni mek, Dr Shaheed Saeed pawh man tel a ni.
NIA chuan mi paruk an man tawh a. Thawhtannia hmun hrang hrang dapna kaihhnawihah hian mi dang pawh man belh an awm zui rin a ni.